A Federación de Asociacións Veciñais “ Lucus Augusti” da provincia de Lugo recibiu este luns, 31 de xaneiro de 2022, a visita dos Deputados Nacionais Jaime de Olano Vela e Joaquín García Díez, o Deputado Autonómico e Portavoz do Partido Popular no Concello de Lugo Ramón Carballo Páez, e o Concelleiro e Viceportavoz do Partido Popular no Concello de Lugo Antonio Ameijide Osorio, para abordar o drama que na cidade e provincia supón a ocupación ilegal de inmobles.
Dita reunión tivo lugar ás 20.00 horas no local da Federación Veciñal “ Lucus Augusti” e a ela acudiron os membros da Comisión Permanente da entidade.
O encontro produciuse despois de remitir unha nova nota de prensa denunciando o incremento de casos de ocupación ilegal na cidade de Lugo, e máis concretamente no barrio do Sagrado Corazón.
Ao longo da reunión, os parlamentarios do Partido Popular fixeron un repaso das medidas que desde o Grupo Popular no Congreso, o Grupo Popular no Senado e o Grupo Popular no Parlamento de Galicia e no Concello de Lugo deseñaron para loitar contra esta situación de ocupación ilegal que afecta a miles de persoas na contorna cotiá.
A este respecto, desde a Federación Veciñal “ Lucus Augusti”, encabezada polo seu Presidente Jesús Vázquez Varela, “matizamos unha vez máis nosas demandas a este respecto. Demandas compartidas, así mesmo, coa Confederación Galega de Asociacións Veciñais “Rosalía de Castro” – CoGaVe”.
Entre as demandas da asociación atópase a garantía da propiedade privada, sen fisuras, que se modifique a Lei a efectos de que sexa considerado delito a ocupación, con penas de prisión de 1 a 3 anos, que se habilite á policía e demais forzas e corpos de seguridade do estado a que no prazo máximo de 48 horas poidan proceder ao desaloxo do inmoble no caso de que non se presente un documento válido, baixo multa se non é válido, que acredite a propiedade, tal e como sucede noutros países de Europa.
A reunión transcorreu e concluíu nun ambiente moi positivo, onde a concordancia foi total coa proposta de Lei Orgánica presentada en febreiro de 2021 polo Grupo Popular no Congreso dos Deputados.
Ademais de todo o anterior, houbo concordancia no feito de que desde as entidades locais debería crearse unha oficina de asesoramento ás cidadáns vítimas de ocupación; así como a nivel autonómico, a través do Instituto Galego de Vivenda e Solo, como xa se solicitou desde a Federación Veciñal “ Lucus Augusti”.
Ademais, afirman que “son os Servizos Sociais os que deben actuar para axudar ás persoas en risco de exclusión social; deixando sen efecto que a ocupación sexa unha saída para ninguén; e impedindo, tamén, o empadroamento en caso de ocupación”.
GOBERNO LOCAL
Ante esta situación o goberno local lamenta que “o Partido Popular viva ancorado permanentemente na estratexia de infundir temor, xerar alarmismo e tratar de exacerbar calquera sentimento de inquietude cidadá sempre culpabilizando de xeito directo e sistemático á Administración local, incluso sobre dous aspectos que non son competencia municipal como é a vivenda, materia que xestiona a Xunta de Galicia, e a seguridade cidadá, tutelada polo Goberno Central”.
“Aínda así, e como tantas veces ten referido a propia rexedora, calquera cuestión que xere malestar ou incerteza na poboación lucense, nos competa ou non, sí que nos incumbe e mostra diso é o diálogo e colaboración constante que mantemos con outras Administracións, como pode ser a subdelegación do Goberno para atallar calquera incidencia que garde relación co mantemento da
orde pública”, manifestou o portavoz municipal.
Miguel Fernández insistiu en que “o feito de que exista unha soa ocupación en Lugo xa nos preocupa e estamos traballando, dentro das nosas capacidades, para evitar que se reproduza”.
“E se ben, por outra banda, ofrecemos toda a cooperación posible da Policía Local para disuadir e impedir as okupacións, neste caso, a lexislación actual – non o Concello de Lugo – obriga a que sexan os propietarios das vivendas afectadas os que denuncien e poñan en coñecemento da xustiza aqueles casos que se produzan para poder actuar contra eles”, afirmou Fernández.
