A edil de Medio Ambiente, Mali Méndez, visitou no día de onte os dous colexios de primaria, CEIP de Cervo e CEIP Península da Paz, con motivo da conmemoración do Día da Árbore.
Nesta visita foi acompañada do técnico de xardinería municipal, que fixo unha explicación aos nenos e nenas sobre a importancia de coidar as superficies arboradas e os beneficios que as árbores lle aportan á contorna: transformación de dióxido de carbono en osíxeno, minimizar os riscos de inundación, evitar a erosión, etc.
Por último, ofrecéuselles un pequeno agasallo en forma de árbore autóctona para que cada neno ou nena o levase para a casa e o puidera plantar. Entregóuselles, ademais, varios niños para colocar nas árbores do xardín do colexio, nos que van poder comprobar de primeira man como os paxaros aniñan ao longo da primavera.
Méndez subliñou “o valor de crear conciencia a estas idades e que vexan de primeira man a importancia de coidar o medio ambiente e a existencia de árbores autóctonas”.
“Foi satisfactorio ver como os nenos e nenas espertaban a súa curiosidade sobre temas medioambientais a través da gran cantidade de preguntas que formularon. Tratouse dunha xornada moi enriquecedora e divertida” engadiu a concelleira.
Tamén fixo unha visita ao Centro de Día – Residencia de San Ciprián, na que se fixo a plantación dunha árbore autóctona para celebrar este Día da Árbore.
