O Bloque Nacionalista Galego en Vilalba presenta unha moción na que se solicita a revisión das condicións de traballo das traballadoras e traballadores do Servizo de Axuda no Fogar (SAF).
A moción demanda ao pleno do Concello de Vilalba a que inste tanto á Xunta de Galiza como ao goberno municipal a mellorar as condicións contractuais e velar polo cumprimento do convenio colectivo do SAF. Neste último caso, demándase aboar ás traballadoras e traballadores un incremento salarial do 6,5%, dereito recollido neste acordo laboral.
Mónica García, responsábel local do BNG en Vilalba, declarou “o Servizo de Axuda no Fogar é un servizo esencial, débese cumprir cos seus dereitos e valorizar o seu traballo como merecen, polo que desde o BNG impulsamos esta moción xa que hai que dignidicar e defender este servizo”
A responsábel nacionalista destacou que os acordos laborais do Convenio Colectivo de Atención ao Fogar teñen a obriga de cumprirse “o Concello de Vilalba debe facer cumprir á empresa adxudicataria con estes acordos laborais, é parte dos pregos de condicións do servizo”.
