O Goberno de Lara Méndez facilitará un curso escolar máis a conciliación nos eidos laboral, familiar e persoal cunha nova edición do programa Aprende Xogando. Nesta liña, a concelleira de Muller e Igualdade, Silvia Alonso, vén de anunciar a apertura do prazo de inscrición desta iniciativa para o 1º trimestre do curso, correspondente ás tardes dos meses de outubro, novembro e decembro. A matrícula poderase realizar do 1 ao 6 de setembro (ambos os dous días incluídos) de xeito telemático.
Silvia Alonso insistiu nos obxectivos deste programa, que facilita o acceso ao traballo, á formación e á participación social das persoas con menores ao seu cargo, promove hábitos educativos axeitados nas nenas e nenos e fomenta a práctica do xogo en grupo seguindo o modelo coeducativo.
“Apostamos de novo por esta prestación, que permite a conciliación e ademais faino con métodos que contribúen ao desenvolvemento da personalidade das nenas e nenos a través do xogo e dos xoguetes como eixes central de intervención”, subliñou a concelleira, quen lembrou que o Aprende Xogando apoia de xeito especial ás mulleres no seu proceso de participación sociolaboral.
O Aprende Xogando está dirixido a nenas e nenos empadroadas/os no Concello de Lugo cunha idade comprendida entre os 4 e os 12 anos. Poderán acceder ao programa menores con 3 anos que se atopen escolarizados e sempre que cumpran os 4 anos no período solicitado.
O programa levarase a cabo en horario de tarde, das 16:00 ás 20:30 horas e en período das vacacións escolares tamén con opción de maña, das 9:00 ás 14:00 horas nos centros de convivencia Maruja Mallo e Uxío Novoneyra, así como na nave de vías e obras do parque da Milagrosa.
As solicitudes para este servizo, efectuaranse a través do correo electrónico aprendexogando@lugo.gal achegando, con carácter obrigatorio, fotocopia do DNI da nai/pai ou da persoa que represente legalmente ao menor, que asine a solicitude; fotocopia cotexada do libro de familia ou documentos equivalentes, fotocopia da tarxeta sanitaria da nena/o e certificado médico ou informe de calquera dato médico de relevancia para a prestación do servizo.
No caso de que o número de solicitudes presentadas fose superior ao das prazas ofertadas, aplicaranse as seguintes prioridades: fillas/os de mulleres víctimas de violencia de xénero, de familias monomarentais ou monoparentais, de nais/pais con persoas dependentes ao seu cargo e nais/pais que traballen ou estean a formarse.
