Chega a Fonsagrada Galegas Dixitais, un programa de formación gratuito para a dixitalización de mulleres desempregadas, autónomas e traballadoras anotadas como mellora de emprego na Oficina de Emprego durante o mes de novembro e decembro.
O programa ten como principal obxectivo mellorar as capacidades dixitais das mulleres residentes en zonas rurais. Con este proxecto preténdese ademais incrementar o nivel de empregabilidade, impulsar o emprendemento e o desenvolvemento rural e reducir a fenda de xénero.
Trátase dun proxecto no que colabora o Concello da Fonsagrada e financiado pola Xunta de Galicia a través dos fondos Next GenerationEU e do Plan de Recuperación, Transformación e Resiliencia da Unión Europea.
As accións formativas que se van levar a cabo son competencias dixitais básicas, avanzadas e de iniciación para o emprendemento, formación dirixida toda ela a mulleres preferentemente desempregadas e pertencentes a concellos de menos de 30.000 habitantes.
As participantes no programa farán un itinerario formativo deseñado para avanzar dende un nivel básico de competencias dixitais ata un nivel avanzado, coa fin de ter uns coñecementos das novas tecnoloxías que lles permitan maiores posibilidades de empregabilidade ou emprendemento.
A formación será impartida por expertos docentes na aula CeMIT Casa da Cultura e ao finalizar entregarase un título oficial acreditativo emitido pola Dirección Xeral de Formación e Colocación da Xunta de Galicia.
Ademais, co obxetivo de facer posible o uso das novas tecnoloxías, tras a formación as participantes recibirán un ordenador portátil de agasallo, co que poderán pór en práctica todo o aprendido.
As persoas da provincia de Lugo interesadas poden facer unha preinscrición na web www.galegasdixitais.es ou chamar aos teléfonos indicados nesta.
