Maña sábado 8 de outubro chega ao concello de Triacastela o concurso Interritmos Sons do Rural de música tradicional galega. Terá lugar no entorno da Castiñeira de Ramil ás 13.00 horas.
Esta segunda xornada de Interritmos Sons do Rural acollerá a músicos, grupos e bandas instrumentais e/ou vocais compostos por un máximo de 8 integrantes, dedicados á música tradicional ou que beban da música de raíz. O concurso segue mantendo o formato de concurso na rede, seguindo as pautas da edición pasada.
Baixo o título Interritmos Sons do Rural, este concurso organizado polos Grupos de Desenvolvemento Rural, Asociación de Desarrollo Local Deloa, Ribeira Sacra-Courel, Salnés Ulla Umia e a Asociación de Desenvolvemento da Comarca de Ordes, este concurso fai fincapé na importancia de desfrutar da música en directo.
A parte de música e danza haberá relatores que acompañarán a charla coloquio Música e danza, foliada asegurada, moderada por Marta Gómez (TVG) e serán: Quique Peón (bailador, investigador e divulgador do folclore tradicional galego) e Leni Pérez (investigadora e mestra de música tradicional).
A actuación musical correrá a cargo de Tumba E Dálle, un dos grupos gañadores de Interritmos Sons do Rural. A xornada finalizará coa degustación de produtos locais.
O premio inclúe a gravación dunha peza que procederá de traballos de recollida do ámbito de actuación dos territorios de Deloa, Ribeira Sacra-Courel, Asdecomor e/ou Salnés Ulla Umia e dun vídeo promocional, nun estudo de gravación profesional.
Os membros do xurado son Chema Cebeiro (mestre e investigador etnográfico), Olga Kirk (presidenta, mestra e investigadora de música e baile tradicionais), Santi Castromán (docente e profesional da industria cultural e audiovisual, representante do Festival da Luz) e Fransy González (transmisora oral da nosa música tradicional).
