No exterior da biblioteca municipal pódense ver todas as obras do alumnado do CEIP Castro de Ouro, participantes no XX Concurso de Postais de Nadal de Alfoz deste ano.
Os gañadores das 3 categorías, Educación Infantil, 1º,2º e 3º de Primaria, 4º, 5º e 6º de Primaria desveláronse tras a actuación de Monicreques de Kukas “Xan Perillán e a maleta máxica”.
Na categoría de Educación Infantil, a postal gañadora corresponde a Samuel Alonso Stuparu. Na categoría de 1º ciclo de Educación Primaria o premio foi acadado por Uxía Vivero Santín e na categoría de 2º ciclo de Educación Primaria a gañadora foi Iria Valea Barreira.
A entrega de premios realizouse no salón de actos da casa da cultura de Alfoz, onde Marisa Goás, Concelleira de Cultura entregou os diplomas e premios, non só aos gañadores das tres categorías senón a todo o alumnado do CEIP Castro de Ouro que, ademais do correspondente diploma de participación, recibiron un pequeno agasallo como mostra de agradecemento ao seu esforzo.
O Club de Lectura da Biblioteca de Alfoz foi quen exerceu de xurado e o tiveron bastante difícil pola calidade das obras para elixir aos gañadores, que só podían ser un por categoría.
