Inicia as obras de rehabilitación integral do instituto IES Nosa Señora dos Ollos Grandes cun investimento de máis de 1,5 millóns de euros por parte da Xunta. O conselleiro de Cultura, Educación, FP e Universidades, Román Rodríguez, acompañado polo delegado territorial da Xunta en Lugo, Javier Arias, visitou esta maña o centro para comprobar o inicio dos traballos que, debido ás condicións climatolóxicas destes días, arrancaron no interior do edificio.
Román Rodríguez explicou que esta é unha das dez actuacións en materia de mellora de infraestruturas educativas que ten en marcha a Consellería na cidade de Lugo cun orzamento de case 12M€ que, en palabras do conselleiro, “son o mellor exemplo do compromiso do Goberno galego con esta cidade no que atinxe a esta área concreta”.
Ademais da dos Ollos Grandes, o conselleiro referiuse a obras como a rehabilitación integral do colexio Paradai e dos institutos Anxel Fole e Lucus Augusti, entre outros. Tamén se referiu á instalación da central de biomasa que dará servizo a un complexo integrado polo Ollos Grandes, o Lucus Augusti, o Politécnico e o colexio Anexa, cuxa obra xa está adxudicada e iniciados os traballos previso de replanteo.
As obras, que teñen un prazo de execución de cinco meses, están enfocadas á acadar unha maior eficiencia enerxética e unha mellor funcionalidade do edificio. Para elo, os traballos seguen as especificidades técnicas establecidas no Plan de Nova Arquitectura Pedagóxica, a folla de ruta do Goberno galego para acadar colexios e institutos máis innovadores, confortables e sostibles.
Así pois, no que atinxe á eficiencia enerxética, a actuación abrangue a substitución das carpintarías exteriores de aluminio por outras de madeira, o cambio do falso teito por outro de placa de xeso laminada, a instalación de illamento térmico en toda a fachada do edificio, así como de luminarias tipo LED.
En canto á funcionalidade do edificio para adaptalo ás actuais necesidades do centro, vanse ampliar dúas aulas e construír unha zona de aseos novos na segunda planta do edificio. Tamén se reestruturarán os espazos das salas de xuntas e da de profesores para gañar máis espazo para a biblioteca escolar. Ademais, co fin de evitar humidades e acadar un maior confort, crearase un circuíto de ventilación na zona do ximnasio e dos departamentos anexos e pintaranse os paramentos interiores e exteriores.
