Daniel Camino Barral é o gañador do concurso do cartel que anunciará a XLIII Feira do Viño de Amandi, que se vai celebrar os días 31 de marzo, 1 e 2 de abril, coincidindo como é habitual co fin de semana do Domingo de Ramos.
No concurso participaron preto de 30 persoas con orixinais chegados desde diferentes puntos do Estado, pero foi Camino, deseñador gráfico natural de Arzúa e residente en Monforte de Lemos, quen conseguiu o logro e ten pensando abrir proximamente un estudo en Monforte.
Gañou en dúas ocasións o certame de carteis da Feira do Queixo de Arzúa e foi finalista noutros concursos, como o dos San Fermíns de Pamplona, o do Festival de Cine de San Sebastián ou o concurso de Terras Gauda.
O xurado do certame estivo coordinado por Rodrigo Coucheiro, o gañador do concurso no ano 2019, quen elixiu o cartel presentado por Daniel Camino Barral.
O deseño que anunciará a Feira do Viño de Amandi será presentado oficialmente xunto aos restos arqueolóxicos do hórreo romano de Proendos o sábado 4 de Marzo as 12.00 horas do mediodía, data na que se dará a coñecer a programación do mes do Amandi e o programa de actividades da XLIII Feira do viño de Amandi. Este ano por vez primeira a feira dará comezo na xornada do venres pola tarde.
