O Ministerio de Transición Ecolóxica financiou o proxecto co que se substituíron 404 luminarias de tipo tradicional por LED e renováronse 10 cadros eléctricos destes dos núcleos, os de maior poboación do municipio.
A subdelegada do Goberno en Lugo, Isabel Rodríguez, confirmou no Concello de Cospeito o impulso á transición enerxética que está a levar a cabo o Goberno nos municipios pequenos da provincia. “Mantemos un compromiso claro co municipalismo e os veciños e veciñas percíbeno, destinando axudas a concellos como Cospeito para mellorar e modernizar servizos públicos básicos”, remarcou a subdelegada quen explicou que a localidade recibiu unha achega de 220.000€ do Ministerio de Transición Ecolóxica e o Reto Demográfico, a través do Instituto para a Diversificación e Aforro da Enerxía (IDAE), que permitiu renovar o sistema de alumeado público exterior dos núcleos de Muimenta e Feira do Monte.
Isabel Rodríguez desprazouse ata o Concello de Cospeito para supervisar, xunto ao alcalde, Armando Castosa, os investimentos do Goberno no municipio e coñecer as súas demandas e opinións. Así, comprobou o resultado deste proxecto de eficiencia enerxética financiado polo Executivo Central co que se substituíron 404 luminarias de tipo tradicional por luminarias de tipo LED e renováronse 10 cadros eléctricos destes dos núcleos, os de maior poboación do municipio.
“Estas actuacións permiten ao Concello reducir un 74% o consumo de enerxía eléctrica, aforrando máis de 33.000 euros ao ano ás arcas municipais, podendo empregar estes cartos en atender outras necesidades da cidadanía”, expuxo Isabel Rodríguez. Nesta liña, asegurou que nun momento de incerteza como o actual, derivado da Guerra en Ucraína, que provoca a subida do prezo da luz, “este tipo de iniciativas cobran aínda máis relevancia”.
Igualmente, a subdelegada sinalou que dende o Goberno “seguimos traballando da man dos Concellos da provincia para levar a cabo un desenvolvemento urbano sostible nas vilas, apostando por modelos verdes, con consumos máis eficaces, responsables e respectuosos co medio ambiente”.
Internet de alta velocidade
Isabel Rodríguez avanzou a presenza de Cospeito nas dúas convocatorias de dixitalización do territorio que impulsa o Ministerio de Asuntos Económicos e Transformación Dixital dentro do Plan de Recuperación. Grazas a isto, Cospeito contará con internet de alta velocidade, superior a 300mb, en 631 puntos nos que se localizan 2.438 vivendas e empresas do municipio. “Garantimos a conectividade de máis de 300 megas á práctica totalidade do territorio, en zonas nas que a día de hoxe non dispoñen deste tipo de cobertura, básica para a xente que vive no rural e para asentar nova poboación”, engadiu Isabel Rodríguez.
