Coureleando organiza unha ruta de dous días para esta fin de semana, 4 e 5 de marzo pola Serra do Courel.
A actividade, que é de dificultade media/baixa, será guiada polo técnico deportivo de media montaña Guillermo Díaz.
Comezará ás 09.30 horas do sábado no Bar O Mirador do Folgoso do Courel e terá un prezo de 15 euros por persoa se as persoas interesadas queren participar só o sábado ou o domingo e un prezo de 20 euros se queren ir os dous días.
Os menores de 8 a 15 anos que irán acompañados dos seus pais poderán participar desta actividade de balde.
Programa das rutas
O sábado os participantes andarán 15 quilómetros cunha pendente de 400 metros e contemplarán a paisaxe das Taras de Visuña, así como as vistas ás calizas cámbricas. Tamén camiñarán sobre algunhas das rochas máis antigas de Galicia e visitarán a Ferrería de Órreos.
Esta actividade de xornada completa servirá para que os participantes vaian por unha ruta por vales de Galicia con xeoloxía, natureza e cultura tradicional na que, ademais, haberá un tempo para ver a paisaxe da rodaxe de ‘As Bestas’.
Pola súa parte, o domingo as persoas interesadas percorrerán 9 km cunha pendente de 200 metros pola ruta do Castro de Vilar con especial parada para a interpretación do castro.
Desde Coureleando piden ás persoas que vaian participar que leven botas de monte, bastóns, mochila con auga, comida para picar, roupa cómoda e abrigada.
Para anotarse, hai que mandar unha mensaxe ao número 626 64 30 21.
