O candidato do PP á alcaldía de Monterroso, Eloy Pérez, está a intercambiar impresións cos veciños e colectivos mantendo distintos encontros e reunións para dar a coñecer aspectos do programa electoral co que o Partido Popular concorre ás eleccións municipais do vindeiro 28 de maio. Recentemente, nunha xuntanza con representantes de varias entidades deportivas do municipio deu a coñecer algunha das súas propostas neste ámbito.
O candidato popular celebra que “Monterroso conte con equipos de fútbol en varias categorías” e aposta polo apoio á disciplina. Entre as iniciativas abordadas na xuntanza, sinalou “a modificación da normativa urbanística para facer posible a construción de novas gradas no campo de fútbol, a mellora dos aseos para o público e o estudo da reforma e ampliación do edificio no que están aloxados os aseos para o público e o ximnasio para os futbolistas”.
Pérez ten en conta tamén “a elevada demanda e o auxe do pádel en Monterroso” e explicou que “está en fase de estudo unha aplicación para xestionar todo o relativo á reserva das pistas dende o móbil”.
Outro deporte con gran demanda é o ciclismo e, neste caso, comprometeuse a ceder un local para as actividades do Club Ciclista San Miguel e dotar a Monterroso dun punto de limpeza para bicicletas.
No ámbito do automobilismo, Eloy Pérez pretende “continuar a apoiar a proba de Slalom en Monterroso e buscar a colaboración doutros Concellos e administracións para recuperar o Rally Comarca da Ulloa” porque “estas citas contribúen á dinamización social e económica do noso concello”.
Tendo en conta que “Monterroso contan con deportistas, pero no noso concello non hai instalacións para a práctica do motociclismo; o popular propón estudar a posibilidade de construír unha pista multifuncional na que poder adestrar e que tamén sirve como circuíto de karts”. Neste caso, explica que “situada preto da área recreativa da Peneda, complementaría e potenciaría a zona”.
PROMESAS CUMPRIDAS
Eloy Pérez defende que “o PP cumpriu o prometido no programa electoral do 2019 no ámbito deportivo”. É o caso da construción da terceira pista de pádel e a dotación de aseos, duchas e instalación eléctrica. E no campo de fútbol, “rexenerouse o céspede e melloráronse os vestiarios e a cafetería”.
