Máis de 12.000 peregrinos pasaron pola comarca de Sarria durante esta Semana Santa para percorrer o Camiño Francés do Camiño de Santiago que leva a Compostela.
Así o afirmou Jorge López, presidente da Asociación de Amigos do Camiño de Santiago na Comarca de Sarria, quen defende que a ocupación hostaleira da fin de semana pasada rozou o 90 % en Sarria e nos concellos limítrofes.
O xoves chegaron a Compostela 20.000 persoas, das que o 60 % proviñan do Camiño Francés. Moitas persoas comezárono en Sarria e outras viñan desde Triacastela.
“En total, poderíase dicir que máis de 12.000 persoas percorreron o Camiño Francés desde a comarca de Sarria cara a Santiago de Compostela”, argumenta Jorge López.
Di que esta grande afluencia de xente, “que seguirá en verán”, é debido ao “bo tempo”, entre outros motivos e que veu xente “de varias procedencias: españois, alemáns, italianos, franceses, coreanos, de Canadá e algún americano”.
“Pola oficina viñeron moitas persoas, de 12.00 a 14.00 e de 17.30 a 19.00 horas de luns a venres que estivemos”, defende, e di que “houbo momentos de agobio da cantidade de xente que había”.
Con respecto ao futuro, di que “isto vaise estabilizar de aquí a fin de mes, vai vir xente pero non tanta e en maio volverá a vir máis xente”.
