Axentes medioambientais do Servizo de Patrimonio Natural en Lugo da Consellería de Medio Ambiente, Territorio e Vivenda paralizaron de forma cautelar esta mañá a tala de árbores prevista no edificio de Santa María para verificar a existencia de niños.
Os axentes realizaron unha inspección a raíz dunha denuncia formulada por un particular. Trasladados ao lugar, comprobaron que entre os restos da poda inicial -que precede á tala dos exemplares- había cando menos un niño e contiña cascas de ovo.
A investigación deberá determinar o número de niños que albergan as árbores así como as especies de paxaros ás que corresponden e se se atopan actualmente na época de nidificación, antes de levantar a suspensión cautelar, de ser o caso.
O PP insta ao bipartito provincial a escoitar á sociedade lucense que reclama que se descarte a corta de sete árbores do antigo Fogar de Santa María e se modifique o proxecto do aparcadoiro.
No PP ven unha pugna entre socialistas e nacionalistas polas competencias sobre o recinto do antigo Fogar de Santa María
A OBRA
A Xunta de Goberno da Deputación aprobou en abril a adxudicación por 450.000€ das obras de reforma e mellora do entorno do Fogar de Santa María, de titularidade provincial, coas que a Deputación creará 165 prazas de aparcamento que poñerá a disposición da cidadanía de maneira gratuíta fóra do horario laboral dos traballadores e traballadoras provinciais. As obras foron adxudicadas á empresa Construcciones Sanle SL e teñen un prazo de execución de tres meses, un mes menos que o contemplado nos pregos de licitación.
