O recinto gandeiro de Adai cumpriu coas mellores expectativas para a celebración do concurso e da poxa organizadas pola Asociación de Criadores de Raza Rubia Galega, Acruga, nunha xornada na que se adxudicaron todos os animais e que finalizou cun prezo medio de máis de 2.600 euros. Antes de arrincar a poxa 58 criadores de toda Galicia, aínda que en especial da provincia de Lugo, retiraran a súa tarxeta o que demostraba o interese por facerse con algún dos exemplares que hoxe pasearon polo anel de poxas #ante numeroso público.
A poxa abrírona os machos, tres propiedade de Acruga e o resto presentados por particulares, con prezos de saída que ían dos 2.000 aos 2.500 euros. Vendéronse todos, cun prezo medio de 2.685 euros, pero o que logrou maior cotización foi un exemplar da gandería de Manuel Antonio Fernández Rodríguez, vendido en 3.400 euros a un criador de Sarria.
A poxa de xatas preñadas abriuse cos exemplares do centro de recría da Granxa Gayoso Castro, dependente da Deputación de Lugo. Dada a calidade e a garantía destes animais sempre conseguen moi bos prezos, pero que as tres primeiras xatas superasen os 3.000 euros, chamou a atención de todos. Ademais das nove xatas de Acruga, presentáronse á poxa outros cinco exemplares de particulares. Ao final, foi precisamente a primeira xata da mañá, chegada da granxa de Castro de Ribeiras de Lea, a que logrou a maior cotización con 3.100 euros, un prezo moi alto se se ten en conta que o de saída era de 2.000. Adxudicáronse todas elas, a maioría a gandeiros lucenses, pero tamén a criadores chegados da Coruña. O prezo medio destes animais foi de 2.610 euros.
Premios repartidos no Concurso Nacional
Unha vez finalizada a poxa, procedeuse á entrega dos premios do concurso nacional, que este ano chegaba á súa edición trixésimo sexta. Un centenar de exemplares de pura Raza Loura Galega tomaron parte neste certame nacional, no que un ano máis se distinguiu ás ganderías cos animais máis destacados. Os xuíces titulados de Acruga e os inspectores da raza certifican que cumpren cos estándares raciais, así como coas condicións morfolóxicas e xenéticas, para avalialos e designar aos gañadores. Os premios estiveron moi repartidos, con ganderías xa habituais en certames de loura galega, pero tamén coa presenza de novos criadores que se animaron a participar no concurso.
Con catro premios destacaron as explotacións de Manuel López Quiroga, de Samos, e Gandería A Morena, do Corgo, que levou ademais o premios a mellor lote de gando. Ademais logrou dous segundos premios en xatas de 18 a 24 meses e en exemplares de ata 8 meses, ademais dun terceiro na categoría de vacas paridas.
Pola súa banda Manuel López Quiroga logrou a máxima distinción nas xatas de 18 a 24 meses e tamén en becerros de 8 a 18 meses; e dous segundos premios en becerros de 8 a 14 meses e en sementais.
O gandeiro do Corgo José Antonio Ferreiro Palacios foi outro dos grandes gañadores da xornada, porque obtivo tres premios, pero dous deles supuxeron a máxima distinción en sementais e en vacas paridas. Ademais logrou un terceiro na categoría de exemplares ata 8 meses. A Gandería Santalla, do Corgo, e a explotación de Penín Puente de Friol, ambas as habituais neste certame, lograron dous galardóns cada unha, entre as que destaca o primeiro premio para becerros de 8 a 14 meses para a explotación do Corgo.
Tamén hai que destacar os primeiros premios en xatos de 14 a 26 meses para a gandería Pena Guisande, do Páramo, e á explotación do Corgo de Alfredo Méndez Cáceres, que foi o gañador na categoría de machos e femias ata 8 meses. Ambas as ganderías estreáronse neste concurso como galardoadas con estes dous primeiros premios.
Ademais de todas estas explotacións, lograron unha distinción nalgunha das sete categorías as ganderías de Manuel Antonio Fernández Rodríguez, Javier Santalla Prado, Gonzalo Seoane Prado, Alejandro Gutiérrez Villanueva e Mari Luz Penín Rouco.
