Técnicos do Concello de Lugo colaboran estes días co Obispado para tratar de detectar a orixe das humidades que afectan á Capela dos Ollos Grandes da Catedral, nas que a entidade relixiosa xa está a traballar.
No transcurso da execución dunhas reparacións provisionais na Travesía Deán Fernández Varela, o persoal municipal púxose a disposición da Diócese para revisar as canalizacións públicas da cidade co fin de descubrir de onde parten as filtracións de auga que o templo sofre dende hai varios anos.
“Preocupados polo alcance que pode ter esta situación, que perdura no tempo sen conseguir revertela, ofrecemos a nosa cooperación para tratar de dilucidar se a problemática puidera xurdir dalgún punto das canalizacións públicas co fin de que este reforzo de recursos axude a determinar de onde procede a auga que verte á construción e poder, así, darlle unha solución”, sinalou a alcaldesa, Lara Méndez.
A rexedora incidiu no simbolismo e valor patrimonial que esta capela da Virxe dos Ollos Grandes, á que está consagrada á Catedral, ten para Lugo.
“Obra do arquitecto Fernando Casas Novoa, data do século XVIII e o seu retablo – creado polo escultor Miguel de Romay – está catalogado como un dos mellores do barroco galego, alén de albergar a talla policromada da patroa da cidade que tanta devoción ten no noso municipio”, salientou a rexedora, “polo que contribuiremos en canto estea na nosa man para garantir a súa conservación e protección”, afirmou Méndez.
