O BNG de Sarria rexeitou formar goberno da man do partido Camiña Sarria de Claudio Garrido porque o seu lugar está na oposición, como sostivo Efrén Castro, cabeza da lista do partido nacionalista sarriao.
Claudio Garrido mostrara a súa intención de buscar apoios neste partido, xa que acadou 7 concelleiros nas eleccións municipais de 2023, unha cifra que non lle dá para gobernar con maioría absoluta, que está nos 9, polo que os dous concelleiros do BNG serviríanlle para darlle estabilidade ao goberno local.
Con respecto aos outros dous partidos con representación na próxima corporación municipal sarriá, o PP e o PSOE, tampouco tiveron a intención de manter reunións co partido maioritario nin viceversa, debido ás súas diferencias ideolóxicas.
Así, Garrido intentouno co BNG, pero este partido declinou a oferta por entender que o seu papel estaba cos outros dous partidos; na oposición. Desta maneira, este sábado Claudio Garrido será investido, de novo, alcalde de Sarria e terá que afrontar outros catro anos de goberno en minoría, o que fará que continúe o clima do mandato anterior.
