A subdelegada do Goberno en Lugo, Isabel Rodríguez, deulle a benvida aos 30 funcionarios en prácticas destinados á provincia de Lugo por Institucións Penitenciarias, aos que recibiu na Subdelegación do Goberno. Xunto aos directores dos centros penitenciarios de Monterroso e Bonxe, Félix Rodríguez e José Manuel Pernás, Isabel Rodríguez valorou “a implicación e o esforzo que supón o envío dun número tan importante de funcionarios en prácticas aos dous centros penitenciarios da provincia, que contribuirán a reforzar o persoal e redundarán, ademais, nunha mellor atención ás 494 persoas internas e á súa reinserción na sociedade, que é o obxectivo final deste sistema”.
Tras felicitalos por superar a súa formación inicial, a subdelegada desexoulles o máximo dos éxitos como empregados públicos e pediulles compromiso e profesionalidade coa reeducación da poboación reclusa como un dos principios básicos das Institucións Penitenciarias.
A subdelegada precisou que os novos funcionarios forman parte das convocatorias de emprego público de 2021 e 2022, que están compostas por 1.850 persoas. Os 30 incorporáronse no mes de maio aos centros penitenciarios de Bonxe e Monterroso tras finalizar un curso selectivo onde adquiriron as competencias técnicas necesarias para unha integración profesional progresiva. Nos próximos meses, está previsto que os funcionarios en prácticas completen a primeira fase de teoría e perfeccionamento, para logo someterse a un exame de capacitación e, si o superan, continuar o seu período de prácticas na provincia.
Igualdade de xénero efectiva
Durante o acto, Isabel Rodríguez puxo en valor que por primeira vez o número de mulleres supera ao de homes, cun 66,6% do total, pois dos 30 funcionarios, 20 son mulleres. “Un exemplo da igualdade de xénero efectiva, favorecendo o acceso real da muller a todos os destinos e postos, facendo de Institucións Penitenciarias un corpo atractivo para elas”, subliñou.
Das 30 persoas que iniciaron as súas prácticas, 15 foron destinados ao complexo de Bonxe e as outras 15 ao de Monterroso. Con idades comprendidas entre os 27 e os 51 anos, a maioría son da provincia de Lugo, aínda que tamén hai funcionarios que proceden de distintos puntos do territorio español como Ourense, A Coruña, León, Cádiz, Murcia, Valencia, Toledo, Xaén, Madrid, Cáceres, Sevilla e Granada.
Seguir avanzando
A subdelegada aproveitou a cita para agradecer o esforzo de todo o persoal dos centros penitenciarios de Lugo por seguir avanzando na tarefa de reinserción dos internos e das internas, traballando na educación e formación destas persoas e a súa plena inclusión na sociedade.
