Adif propón a clausura do paso a nivel do punto quilométrico (pk) 424/010, na liña ferroviaria León-A Coruña, ao seu paso polo núcleo de Recimil, ata a súa supresión definitiva.
Mentres tanto, para darlle servizo ao tránsito de vehículos, executaría un camiño que -con carácter provisional- conectaría de maneira paralela co paso inferior situado a 300 metros, máis ao norte. Así o expuxo ao Concello de Lugo e as plataformas de veciños, en dúas reunións mantidas onte, xunto á subdelegación do Goberno de Lugo, aos que reiterou as súas condolencias polo terrible incidente.
En paralelo, a compañía segue traballando na licitación da supresión definitiva do paso a nivel, que prevé licitar no mes de decembro deste ano, co fin de concluír as obras en xuño de 2025.
Este proxecto contempla unha solución sen restricións futuras para o tráfico, en base á construción dun novo paso inferior, lixeiramente cara ao sur (pk 423/960), de altura libre de 5 m, así como a realización de camiños de ligazón co viario actual e outros de acceso ao novo paso, garantindo a mobilidade e permeabilidade da zona.
A actuación forma parte do plan de supresión de catorce pasos a nivel no municipio de Lugo: oito deles xa se atopan en execución e seis -entre eles o situado no pk 424/010- xa contan co proxecto aprobado e licitaranse antes de que finalice o ano.
Camiño provisional ata a supresión definitiva do paso a nivel
O peche anticipado do paso a nivel 424/010 conlevaría a construción por parte de Adif dun camiño provisional paralelo á vía, pola súa marxe dereita, que conectaría o paso a nivel 424/010 cun inferior a 300 m ao norte. A solución requiriría a disposición de terreos, de titularidade privada, nuns 100 m (lonxitude estimada onde os terreos non son propiedade do xestor ferroviario). Estímase que a realización deste camiño provisional podería concluír nuns tres meses unha vez que teña a dispoñibilidade do chan. O Concello de Lugo comprometeuse a xestionar cos veciños a cesión do chan, para poñelos ao dispor de Adif.
A proposta exposta preséntase como alternativa a outra que estudaba a compañía: o peche anticipado do paso a nivel 424/010 co desvío do tráfico rodado por itinerarios alternativos durante 20 meses; asumindo melloras puntuais nos camiños de ligazón.
Melloras inmediatas realizadas e normativa
Nos encontros, Adif detallou tamén as medidas executadas con carácter inmediato para manter os niveis de seguridade do paso a nivel do pk 424/010.
Como consecuencia dos danos ocasionados polo incidente do 12 de xullo, foi necesario restituír o firme do paso a nivel coas súas pezas de caucho (tipo strail) e adecuar as ramplas de acceso ao seu estado inicial. Así mesmo, enmarcadas no plan de mellora dos pasos a nivel do proxecto de renovación integral da liña Monforte-Lugo, substituíuse o entarimado de madeira por superficie strail -unha actuación realizada antes do incidente-; e hanse hormigonado as ramplas de acceso o 2 de agosto, como estaba previsto na planificación de obra, previa ao incidente.
Ademais, intensificáronse os labores de mantemento na contorna do paso a nivel, que inclúen rozas e tallas para mellorar o máximo posible a visibilidade.
A normativa establece o nivel de proxección dos pasos a nivel en función de certos parámetros. O paso a nivel do pk 424/010 presenta un nivel de risco 2 sobre 4 (sendo o nivel 4 o de maior risco segundo a lexislación) e tanto a súa protección actual como o calendario de actuacións para a súa supresión adecúanse ao marco normativo.
Solución máis eficaz fronte a outras propostas
Nas últimas semanas, Adif estudou diferentes propostas para a incorporación dun maior grao de seguridade no paso a nivel e a súa análise lévalle a concluír que a proposta presentada -clausura i e a construción dun camiño provisional paralelo á vía, mentres se aborda a súa supresión definitiva- é a máis eficaz desde o punto de vista técnico e temporal.
A dotación de protección automática para o paso, incluída a solución semafórica -unha proposta solicitada polos veciños- conlevaría prazos de redacción de proxecto, licitación e execución de 23 meses, que levarían a súa finalización a xullo de 2025, polo menos un mes máis tarde que a proposta definitiva exposta.
