O Concello de Láncara organiza este sábado, 12 de agosto, unha actividade refrescante e totalmente de balde para nenos e nenas do municipio na praia fluvial da Pobra de San Xiao.
A cita, que consiste nunha gran festa da escuma, comezará ás 17.00 horas e rematará sobre as 19.00 horas, dúas horas de festa na que a intención é compartir un rato divertido e refrescarse de tanta calor.
Desde o Concello recomendan que os nenos menores de 5 anos asistan á festa baixo supervisión dun adulto, que as persoas participantes leven traxe de baño e gafas, para que non lles entre xabón nos ollos, e que eviten as chanclas que non suxeiten o pé, porque poden esvararse.
