O alcalde, Dani Vega, subliñou que “Ribadeo é o líder indiscutible do turismo na provincia de Lugo” e anunciou nunha comparecencia ante os medios de comunicación a realización de investimentos por importe de máis de dous millóns de euros ao longo dos vindeiros meses.
O rexedor fixo un balance moi positivo do verán “no que subimos 9 puntos con respecto ao 2022. Ribadeo é o líder indiscutible do turismo na provincia de Lugo”. Vega aludiu ás actividades programadas para contribuír á desestacionalización do turismo: Froitos do Mar, que terá lugar o 16 de setembro en Rinlo, e Baños do Mar previstos para os días 23 e 24 de setembro, así como ao Mercado dos Domingos, que seguirá ata mediados do vindeiro mes de outubro. Este domingo, día 17, a xornada estará dedicada ao produto local.
Dani Vega anunciou investimentos por importe de máis de 2.375.000 euros a acometer ao longo dos vindeiros meses. En breve darán comezo as obras nas rúas Manuela Barreiro Pico (215.000 euros), Pipelo (184.000 euros), Forte de San Damián (150.000 euros, a estrada de Noceda a Lexoso (113.000 euros procedentes do Agader) e a reforma do Hospital Asilo (1.600.000 euros). O rexedor indicou que “en outubro darán comezo as obras do asilo, que terán unha duración de 18 meses. É unha obra complexa e difícil porque hai que proceder ao baleirado de todo o inmoble, respectando o seu valor patrimonial”. O Concello traballa para conseguir máis financiamento destinado ao equipamento desa reformada instalación.
Ás preguntas dos xornalistas o alcalde asegurou que o novo centro de saúde, que suporá un investimento de 4.000.000 millóns de euros, será construído nos terreos fronte á gasolineira na zona do Xardín. Sobre a ubicación do mercado semanal dos mércores Dani Vega dixo que “agora non toca”, pero o equipo de goberno é partidario de que retorne ao entorno da Praza de Abastos. Para adoptar unha decisión ao respecto o rexedor quere manter xuntanzas cos vendedores e vendedoras da Praza de Abastos, cos comercios e hostaleiros da zona e tamén cos vendedores e vendedoras do mercado dos mércores.
O alcalde tamén falou da praia das Catedrais e da necesidade de poñer en marcha un servizo de autobuses lanzadeira “que leven e traian á xente de Ribadeo ás Catedrais e viceversa, porque o que queremos é que os visitantes que acudan ao areal volvan para a nosa vila. Ese é obxectivo”. Vega anunciou que de modernizará e unificará toda a sinalización da praia das Catedrais.
PLAN DE MELLORA DE INFRAESTRUTURAS
O conselleiro do Medio Rural, José González, acompañado pola directora xeral da Axencia Galega de Desenvolvemento Rural, Inés Santé, reuniuse en San Caetano co alcalde de Ribadeo, Daniel Vega.
A xuntanza serviu para poñer en valor o plan estratéxico para a mellora das infraestruturas viarias rurais ao longo dos próximos anos no que este Concello da Mariña luguesa está traballando e no que tamén colaborará a Consellería. Tamén se avanzou na cooperación entre Xunta e Concello en materia de recuperación de elementos patrimoniais do municipio.
