O vindeiro domingo 24 de setembro, o Proxecto Ríos de Adega organiza a limpeza simultánea de ríos baixo o lema “Móllate polos ríos”, na que participarán máis de 60 entidades en 52 concellos de toda Galiza. En Lugo, Adega-Lugo, UNED-Lugo e Coidemos Lugo organizarán limpezas en dous puntos do río Rato, ás que poden participar todas as persoas que queiran, tan só teñen que inscribirse antes do venres 22 ás 13h para poder formalizar o seguro de accidentes.
A delegación de Lugo de Adega encargarase dun treito na cabeceira do río Rato. O punto de encontro será ás 10h na escola de Albeiros. Para participar na actividade é necesario inscribirse enviando un correo a adegalugo@adega.gal indicando nome, apelidos e DNI.
Pola súa banda, a UNED e Coidemos Lugo achegaranse ata a Tolda, na desembocadura do río Rato no Miño. O punto de encontro para a realización da actividade será ás 11h na entrada da UNED. O aparcadoiro do centro estará aberto para aquelas persoas que precisen deixar o seu coche. Para participar é necesario inscribirse a través da aula virtual do centro
Os voluntarios serán agasallados cunhas camisolas co lema da limpeza.
O Proxecto Ríos é un programa de Educación e Voluntariado Ambiental que ten a finalidade de dar a coñecer o importante papel dos cursos fluviais, amosar as súas problemáticas así como fomentar iniciativas que permitan á cidadanía o mantemento e a mellora dos ríos proporcionando as ferramentas que garantan a súa participación.
