O vicepresidente da Deputacíon de Lugo e deputado de Deportes visitou o Anexo, onde comezaron as tarefas de instalación do novo pavimento.
Os traballos comezaron coa instalación da madeira sobre a que se asentará o parqué, un material coa máxima certificación da FIBA que garantirá as mellores condicións para os 60 equipos de base que adestran e xogan nas instalacións.
Efrén Castro sinalou que “as tarefas se desenvolven segundo a folla de ruta que compartimos cos clubs que utilizan o Anexo, a quen agradeceu a colaboración para facilitar os traballos” e explicou que “a renovación do parqué suporá unha mellora completa e definitiva para unhas instalacións que viñan arrastrando deficiencias e que son fundamentais para o baloncesto base lucense, xa que o Anexo acolle os adestramentos e partidos da gran maioría dos equipos da cidade”.
A instalación do parqué completará as tarefas de renovación das instalacións desenvolvidas nos últimos meses, con actuacións dirixidas a impermeabilizar o edificio e a mellorar a iluminación, completamente renovada tras a substitución das antigas luminarias por 48 proxectores LED que reducen o consumo eléctrico da instalación nun 60 por cento.
As obras de renovación da instalación, que comezaron o pasado mes de xullo, supoñen un investimento de 320.000 euros.
