A subdelegada do Goberno en Lugo, Isabel Rodríguez, destacou o compromiso do Goberno de España para facer realidade o primeiro Centro de Acollida de Protección Internacional (CAPI) de Galicia en Castro de Ribeiras de Lea, no concello de Castro de Rei. O Ministerio de Inclusión, Seguridade Social e Migracións vén de anunciar a licitación para o proxecto que se creará nas instalacións do antigo Hospital San Rafael, cedido pola Deputación de Lugo.
A subdelegada manifestou que “damos un paso máis para facer realidade este centro de refuxiados, o que demostra a aposta do Goberno de Pedro Sánchez coa provincia de Lugo”. Fixo mención neste senso á visita do Ministro Escrivá a Lugo, agradecendo “que dese a súa palabra e que a materialice en feitos, con este proxecto que se vai facer realidade e será de novo un impulso para o desenvolvemento da provincia”.
Esta licitación permitirá dar un novo uso ao edificio, que terá capacidade para acoller a 250 persoas nun recinto de 43.000 metros cadrados cedidos pola institución provincial.
“Podemos estar orgullosos das políticas públicas que poñemos en marcha na nosa provincia, pensando sempre nas persoas máis vulnerables e con máis necesidades, neste caso de acollemento”, dixo.
