Os veciños do centro, organizados ata hoxe en plataforma, constitúense na nova Asociación de Veciños Centro de Lugo.
Buscan con este cambio “unha entidade xurídica propia, unha consolidación da súa organización e unha necesaria unión veciñal no Barrio Centro”. Con todo, apostan pola continuidade da súa liña de actuación e traballarán nos mesmos temas. Teñen ademais a intención de ampliar a súa actuación coa organización de diversas actividades culturais.
Organizáronse como plataforma no mes de abril, urxidos por uns proxectos de peonalización cos que discrepaban e levan desde entón traballando diariamente e con moita intensidade para mitigar “as innumerables molestias xeradas polas obras derivadas dos mesmos”. A súa pretensión é continuar con ese traballo co mesmo talante de colaboración coas administracións na mellora do barrio Centro da cidade e a calidade de vida dos seus veciños.