A deputada do BNG no Parlamento Galego, Carme Aira, xunto co concelleiro do BNG en Lugo, Alexandre Penas, achegáronse ata o hospital de Calde, onde o persoal denunciou o fallo do sistema de calefacción na xornada de onte. Carme Aira afirmou que “nas últimas semanas véñense repetindo as denuncias do persoal do centro sobre o sistema de calefacción e o subministro de auga quente, sistemas que deberían estar listos para funcionar a pleno rendemento coa baixada das temperaturas”.
O BNG reclama ao goberno galego que actúe en serio para mellorar o confort do persoal e pacientes do centro, mellorando tamén as condicións xerais da instalación, garantindo as condicións necesarias para este tipo de instalacións. Carme Aira anunciou que o BNG presentará iniciativas no Parlamento Galego para instar ao Sergas a mellorar a instalación de calefacción e auga quente deste hospital.
Segundo a deputada do BNG, “a Xunta de Galiza ten que garantir as mellores condicións para o persoal e para as e os pacientes dun hospital”, e engadiu “agardamos que se actúe canto antes para solucionar os problemas desta instalación”.
