A Xunta apoia a undécima edición da ruta 4×4 da comarca de Sarria, que se desenvolverá desde este venres 17 de novembro ata o domingo. O delegado territorial de Lugo, Javier Arias, participou este xoves na presentación xunto con representantes da asociación organizadora, Os Carro x Catro.
Arias explicou que a Administración autonómica patrocina as actividades programadas e achega equipamento do Xacobeo para os participantes. A ruta contará con vehículos todoterreo, quads, buggies e motos. Farán un itinerario por contornas naturais de Sarria e doutros municipios da zona.
Como en anteriores edicións, a cita congregará a persoas procedentes de distintas localidades galegas e doutros puntos de España. O sábado será a xornada principal, na que os participantes farán un percorrido de máis de 100 quilómetros por varios concellos.
O domingo serán as probas de habilidade no polígono do Morelle e a posterior entrega de trofeos. Arias subliñou o impacto positivo que terá esta actividade na economía de Sarria e dos concellos próximos, ademais de servir de escaparate para que os visitantes coñezan todos os recursos da zona.
