O proxecto de humanización e mellora do espazo público no barrio da Fortaleza consiste na substitución do pavimento, o soterramento das canalizacións e a dotación de mobiliario urbano e arborado.
A subdelegada do Goberno en Lugo, Isabel Rodríguez, amosou o seu interese polo proxecto de humanización e mellora do barrio da Fortaleza no concello de Castroverde, que opta aos fondos do programa 2% cultural do Ministerio de Transportes, Mobilidade e Axenda Urbana. Nunha xuntanza co alcalde da localidade, Xosé María Arias, coñeceu de primeira man a proposta presentada nesta nova convocatoria.
Isabel Rodríguez salientou “a aposta do Goberno de Pedro Sánchez pola recuperación e conservación arquitectónica da provincia”, indicando que o programa mobilizou máis de 735.000 euros en Lugo para financiar actuacións de rehabilitación do patrimonio histórico, aportando o Goberno preto de 477.000 euros.
Neste caso, o concello de Castroverde opta por mellorar este espazo público polo que pasa o Camiño Primitivo de Santiago, “unha zona de especial relevancia patrimonial polo castelo que dá nome ao barrio e polo paso da ruta xacobea”. A subdelegada aseverou que “traballamos man a man cos concellos, recollendo as súas propostas para garantir a protección dos seus recursos patrimoniais”.
Nesta liña, Isabel Rodríguez remarcou que o compromiso do Goberno coa conservación e posta do patrimonio reflíctese no incremento que experimentou a porcentaxe de financiamento deste programa na convocatoria do 2023, elevándose do 1.5% ao 2%, o que supón 20 millóns de euros máis, ata un total de 80 millóns de euros dispoñibles na convocatoria deste ano.
