Chantada Quere Sanidade participou nunha manifestación convocada por SOS Sanidade diante do Parlamento en Santiago pedindo que os orzamentos que se destinan a sanidade sexan máis xustos e permitan frear a caída libre que esta experimentando a sanidade pública en todo o territorio.
Así, centos de persoas chegadas dende distintos puntos de Galicia congregáronse para esixir “unha maior dotación orzamentaria para garantir unha sanidade pública e que se revertan as problemáticas que se están a dar tanto na atención primaria como na hospitalaria froito de un desleixo consciente durante anos por parte da administración”, explican desde a plataforma de Chantada.
Ademais, aproveitando a ocasión, dende a plataforma aproveitaron para rexistrar unha queixa na oficina da Valedora do Pobo na que explicamos a situación “abafante que se está a vivir na atención primaria de Chantada e na atención de urxencias na zona de Chantada e Carballedo”, indican.
Esta situación, segundo sosteñen desde Chantada Quere Sanidade, “repercute directamente no Hospital de Monforte e o máis importante, na saúde de todos nós, polo que seguiremos tentando exercer presión para reclamar unha sanidade digna”.
Entre as actuacións, a semana pasada enviaron unha carta ao xerente e agora rexistran unha queixa á valedora do pobo, pero din que seguirán desenvolvendo accións, como a recollida de sinaturas e queixas e acompañando ás plataformas veciñas en defensa da sanidade, sendo a próxima cita en Monforte o día 21 ás 20.00 horas.
Ademais, anuncian que están a traballar para desenvolver unha gran manifestación polas rúas de Chantada o 13 de xaneiro, “todo en favor da sanidade pública, a de todos, para que conte con unhos orzamentos xustos e unhos mellores servizos para todos nós”, conclúen.