Esta actuación enmárcase no proxecto Mil Ríos, unha iniciativa que, cun orzamento de 5 millóns de euros, ten como obxectivo mellorar o estado ecolóxico e a adaptación ao cambio climático de medio cento de ríos e zonas húmidas de Galicia.
A Xunta de Galicia vén de completar os traballos para a restauración ecolóxica da lagoa de Cospeito, que supuxeron un investimento de preto de 450.000 euros.
Durante unha visita a este humidal, na que estivo acompañada polo delegado territorial da Xunta en Lugo, Javier Arias, a vicepresidenta segunda e conselleira de Medio Ambiente, Territorio e Vivenda, Ángeles Vázquez, puxo en valor as actuacións de mellora e restauración executadas co obxectivo de garantir un bo estado de conservación dos hábitats e as especies de flora e fauna que se localizan nesta contorna.
Máis polo miúdo, a vicepresidenta segunda explicou que, entre outras actuacións, leváronse a cabo a recuperación do bosque de ribeira, coa retirada de árbores mortas, caídas ou enfermas do río Guisande; a eliminación de especies exóticas invasoras; a mellora do campo visual dos observatorios a través da corta de arborado e desbroce da vexetación existente no campo visual dos miradoiros, e a renovación do pavimento exterior do centro de interpretación. A maiores, tamén se colocaron morróns para evitar o acceso de vehículos á lagoa, se restauraron os camiños e se renovaron os paneis informativos.
Ángeles Vázquez lembrou que esta actuación enmárcase no proxecto Mil Ríos, unha iniciativa da Xunta que, cun orzamento de 5 millóns de euros, ten como obxectivo mellorar o estado ecolóxico e a adaptación ao cambio climático de medio cento de ríos e zonas húmidas de Galicia, coa previsión de actuar sobre ao redor de 470 quilómetros.
Cómpre lembrar que a nosa Comunidade conta con máis de 31.000 km de ríos, cun alto valor ecolóxico que enriquecen os valores naturais e paisaxísticos de Galicia. De feito, os corredores fluviais constitúen un dos principais reservorios de diversidade de especies silvestres de flora e fauna de Galicia.
Con esta iniciativa, a Xunta pon en valor o papel identitario das arterias naturais de Galicia, responsables de transportar nutrientes, suavizar o clima galego e vertebrar o territorio. Ademais, o impulso por esta iniciativa leva aparellada outros beneficios, como é o impulso do emprego verde e o turismo sustentable.
