“Chega tarde e acórdase 30 días antes das eleccións da gratuidade das matrículas, o que nin Feijóo nin el fixeron en 15 anos e o que sempre vetaron no Parlamento de Galicia”, mentres Besteiro implantou no ano 2014 un plan de apoio ao Campus de Lugo con accións pioneiras e foi o artífice da sede da UNED en Lugo.
O presidente da Deputación de Lugo, José Tomé Roca, asegura que o presidente da Xunta de Galicia, Alfonso Rueda, “é pouco orixinal, e copia medidas educativas en apoio dos universitarios que José Ramón Gómez Besteiro xa impulsou fai 10 anos” á fronte da institución provincial.
“Rueda chega tarde, e acórdase 30 días antes das eleccións autonómicas da gratuidade das matrículas universitarias, o que é claramente electoralista, e ademais acórdase de algo que nin el, nin Feijóo fixeron en 15 anos, e que sempre vetaron no Parlamento de Galicia”, subliñou o Presidente da Deputación. Mentres, Besteiro implantou no ano 2014 un plan de apoio ao financiamento das matrículas no Campus de Lugo con accións pioneiras, ademais de ser o artífice da construción da sede da UNED en Lugo, a única capital de provincia de Galicia que non a tiña.
“Este é un anuncio claramente improvisado e pouco crible, que non vai tapar os 15 anos de total abandono e de castigo que fixeron á educación pública dende a Xunta de Galicia”, afirmou José Tomé, lembrando que só nos dous últimos cursos “a Xunta recortou 1.500 profesores en Galicia, pechou escolas no rural, reduciu ciclos educativos, precarizou o transporte escolar deixando incluso fóra a moitos alumnos e alumnas, e recentemente ata quixo recortar titulacións no Campus de Lugo. Desde a Deputación de Lugo parámoslles os pés, porque continuamos con ese respaldo e defensa da educación pública e do noso Campus”.
Polo tanto, recalcou o presidente, “que non traten de enganar”. “Isto responde á desesperación de Rueda, que se sente acurralado ante o empuxe que está demostrando Besteiro, que se nota nas enquisas, con medidas ilusionantes, de futuro e de impulso a Galicia”. Ademais, José Ramón Gómez Besteiro “está deixando en evidencia que a Xunta non fixo nada polos servizos públicos nestes 15 anos. A educación, a sanidade, a atención aos nosos maiores ou os servizos sociais están moito peor que cando chegou ao Goberno o Partido Popular. Especialmente os servizos públicos como a sanidade están peor que nunca”.
“Esta Xunta do señor Rueda chega tarde a todo”. “Tardou un mes en ir ás praias para preocuparse da crise ambiental dos pellets, antes de que tanto a súa vicepresidenta, como o Conselleiro do Mar, dixeran auténticas barbaridades en relación con esta materia, e tarda 15 anos en preocuparse polos universitarios. Mentres, José Ramón Gómez Besteiro foi o primeiro en pisar as costas afectadas pola marea de plástico para dar solucións, e para estar coa xente do mar e cos concellos, e foi o primeiro en impulsar medidas de apoio para os estudantes universitarios dende a Deputación de Lugo para axudar a financiar as súas matrículas”.
