O alcalde da Pobra do Brollón, Xosé Lois Maceda, anunciou os gañadores e gañadoras do XIV Concurso de Tapas da Guimaralia que se desenvolveu durante a primeira semana de decembro.
Así, o primeiro premio foi para ‘Primeiro de Maio’, cunha tosta do forno local con polbo encebolado e queixo San Simón máis fritura de iuca e plátano; o segundo foi para ‘A Salanova’, cun guiso de faceiras con redución de Mencía, arroz verde e salsa de piquillo con coliflor do Chousa e baldosas de cores do outono; e o terceiro premio foi para ‘Bar Avenida’, con champiñón recheo con puré de pataca e redución de Val do Frade.
Os premiados foron anunciados tras a cabalgata de Reis e recolleron os diplomas Sandra do Avenida, Joel da Salanova e Senén, en representación do Primeiro de Maio.
Desde o Goberno local quixeron darlles os parabéns aos premiados e a todos os establecementos participantes “pola calidade das tapas ofertadas nesta edición do concurso”.
