Lucía Villamor converteuse na líder na nova agrupación das Xuventudes Socialistas de Taboada nun acto organizado este venres na sede municipal da agrupación. Deste xeito, as Xuventudes Socialistas constituíron a súa agrupación na vila. A constitución contou cunha ampla presenza de militantes e cargos do PSdeG e das Xuventudes da provincia e doutras partes de Galicia como Lugo, Monterroso, Ourense ou Vigo.
No acto interviñeron, Yago Atadell, coordinador das XSG na provincia de Lugo; Roi Rigueira, Alcalde de Taboada, Pilar Porto, secretaria de Organización do PSdeG da provincia de Lugo, Lara Méndez, candidata número 2 por Lugo e vicesecretaria xeral do PSdeG, e o secretario xeral das XSG, Xurxo Doval. Lara Méndez, candidata número 2 por Lugo e vicesecretaria xeral do PSdeG, resaltou a importancia de facer chegar a mensaxe do partido á mocidade e ás mulleres.
O secretario xeral das XSG, Xurxo Doval, destacou a necesidade nun cambio real das políticas da Xunta para dotar á mocidade do rural de “oportunidades reais” como, indica, “si fai a Deputación con José Tomé ou como fixo con Besteiro”. Ademais, quixo avanzar algunhas das medidas para o rural que as Xuventudes Socialistas levan no seu Programa Electoral mozo e que presentarán nos vindeiros días, tales como a mellora da mobilidade ou un programa de loita contra o “sexilio” das persoas LGTBI .
Lucía Villamor, a nova Secretaria Xeral da Agrupación, pechou o acto destacando o ánimo do seu equipo para aportar todo o seu esforzo na mellora da vila da man do Concello e do PSdeG de Taboada. A súa executiva estará composta por tres áreas máis: Organización e Acción Electoral, Política Municipal e Igualdade.
