Para os populares resulta significativo que os candidatos doutras forzas políticas “non obtiveran o apoio da veciñanza dos lugares onde naceron”.
Alfonso Rueda asistiu onte en Lugo á reunión da executiva na que valorou os resultados electorais da provincia xunto á cabeza de lista, Elena Candia. Segundo explicou, Lugo obtén a maior porcentaxe de votos para o PP de Galicia con respecto ás catro provincias: 53,39%, tres puntos e medio máis que Ourense, cerca de seis con A Coruña e nove e medio en relación a Pontevedra.
Tamén destacou que o PP na provincia sume 98.803 votos fronte aos 78.420 papeletas que suman o PSOE e BNG, é dicir, máis de 20.000 votos máis para o noso proxecto.
O PP é a primeira forza en todos os concellos da provincia, excepto en tres (en 64 dos 67) que se sitúa como segunda forza; tamén hai que destacar que en 48 municipios superaron o 50% dos apoios (en Friol e Guntín superaron o 70%).
Nese senso tamén insistiu en que Lugo foi a provincia onde menos medrou o voto do BNG pese a formar parte do goberno tanto da Deputación como do Concello da capital. (Lugo +25,16%; Ourense 25,35%; A Coruña 32,66% e Pontevedra 34,69%).
No caso do municipio de Lugo o Partido Popular foi o concello que obtivo o mellor resultado de Galicia “fomos o partido máis votado nas 125 mesas electorais con 26.794 papeletas ; e tamén a forza política que máis aumentou o seu apoio en todos os distritos cun incremento de 4137 votos con respecto ás eleccións de 2020”.
O popular tamén subliñou que na capital lucense o PP obtivo 3.366 votos máis que os que acadaron o PSOE e o BNG xuntos. (PP obtivo 26.794 e PSOE+BNG 23.429)”.
A CAMPAÑA DE CONFRONTACIÓN
Elena Candia tamén recriminou “a campaña de confrontación con ataques infundados, e desprestixio constante cara a Xunta de Galicia, tanto por parte do PSOE como do BNG” engadindo que “non calaron nin no concello de Lugo, nin no resto da provincia”.
A cidadanía falou de forma contundente “impúxose o sentidiño e a capacidade crítica da veciñanza que non se deixou manipular pese a que socialistas e nacionalistas repetiron de forma reiterada mentiras para intentar que se convertese en realidade”.
