Lucía Blanco
Ao longo do Canón do Sil esténdese unha ampla rede de miradoiros desde os que se pode contemplar o espectacular patrimonio natural que ofrecen os paraxes da Ribeira Sacra. Un dos máis singulares encóntrase no Concello de Sober, concretamente na parroquia de Doade. Nela pódese visitar o de Pena do Castelo, un recuncho cunha particular silueta que preside a cunca do Sil e que mestura tradición e historia.
O miradoiro está situado a 600 metros de altura nunha rocha coñecida como O Castelo, unha das máis inclinadas de toda a zona, e que presenta un importante desnivel cunha caída de 400 metros con respecto do nivel do mar. Para chegar é preciso tomar a estrada dende o embarcadoiro de Doade cara Francos e logo seguir o desvío que conduce ao lugar.
Despois o visitante afronta un percorrido duns 600 metros a pé, que ofrece varias áreas de descanso e no que pode desfrutar dun paseo protagonizado por árbores centenarias. Tras unha pequena subida pola formación rochosa —que conta con escaleiras de pedra nos tramos máis verticais para sortear a pendente— pódese gozar das vistas do miradoiro soberés. Dende este punto privilexiado pódese contemplar o embarcadoiro de Doade, do que parten algún catamaráns turísticos que percorren o canón do Sil.
Antigo asentamento castrexo
A panorámica complétana as amplas pendentes cubertas de viñedos, así como as carballeiras e os soutos da provincia ourensá. As incorporables vistas conquistan a retina do que se chegue, aínda que parte do seu encanto especial débese á súa historia, pois está situado sobre un antigo asentamento castrexo do que tan só quedan os restos dun foso. Pénsase que se trataba dun enclave de control das dúas beiras do río na época romana, xa que polos seus arredores discorría a Vía Nova, que unía as cidades de Braga con Astorga.
Pero ademais de conservar as pegadas dos antigos habitantes dos castros, o enclave garda a historia dos devotos que acudían á ermida de San Amaro. Xunto a Pena do Castelo e construída na propia rocha, atópase unha pequena capela en honor ao santo que agocha unha imaxe no seu interior. A construción orixinal, que estaba aos pés do miradoiro, desapareceu a mediados do século XIX e foi recuperada fai case unha década por un grupo de veciños da zona. A beleza deste promontorio natural non pasa desapercibida para todos os que se animan a visitar este conxunto peculiar a modo de balcón sobre o río, que invita a apreciar as inconfundibles bancadas de vides e a enorme riqueza paisaxística que caracteriza a Ribeira Sacra.
