Comezan as actividades da XXXII edición da Festa do Caldo de Ósos, que constituirá unha viaxe pola paisaxe cultural de Taboada, con accións programadas e dando a coñecer a paisaxe cultural do Concello e contorna.
“É moito máis unha celebración gastronómica: é o elemento unificador que xera nexos entre gastronomía, o territorio e a cultura. É tamén o compromiso coas tradicións locais, unha pegada da identidade de Taboada, que se reflicte a través do cultivo agrícola e da cría do porco, do produto que se emprega, da receita do caldo, e ata das formas de servilo ou consumilo”, sosteñen os organizadores.
A programación destaca o protagonismo do produto, pero tamén das persoas, a visibilización e valorización do acervo culinario, a inclusión do Concello de Taboada na axenda cultural de Galicia, a través do reclamo gastronómico, convertendo a convocatoria en plataforma de promoción de desenvolvemento.
Desta forma, a programación, baixo ese concepto de #maiscaunhafestagastronomica, busca incentivar que a xente pase a fin de semana e ata todo o Entroido en Taboada, que participe das actividades e descubra o Concello e contorna.
O caldo de ósos e a potenciación da gastronomía
O eixo sobre o que xirará toda a actividade será a gastronomía, polo que destacará a Feira porcina, o mercado de produto de proximidade e a exposición fotográfica ‘As pegadas do porco celta en Galicia’ de ASOPORCEL.
Ademais, o caldo de ósos será o protagonista, habendo degustacións gratuíta para todas as persoas asistentes, haberá menú da festa en todos os restaurantes de Taboada, proxectarase o documental ‘O caldo de ósos nas súas mans’ e tamén haberá degustación gratuíta de produtos do porco celta.
Tamén haberá un eixo cultural cunha clase mestra sobre a elaboración de embutidos tradicionais, catas maridaxe de viños da D.O Ribeira Sacra co caldo de ósos e cos produtos do porco celta, exhibición e mostra de regueifa e brindos e un obradoiro de máscaras con Viravolta ‘Constrúe a túa propia cachucha’.
Música e voces
A festa tamén estará protagonizada por diferentes artistas, músicos, bandas e voces interesantes. Terán lugar nestes dous días as actuacións da Banda de música de Chantada, os concertos de Tanto nos Ten e De Ninghures e Os Rechouchíos, Folión e Cabezudos.
Ademais, contarase coa presenza de Manolo Gago, a voz elixida para apadriñar o Caldo de Ósos. Gago, importante xornalista e divulgador cultural, vencellado co sector gastronómico e amante do Caldo de Ósos, será padriño e pregoeiro desta XXXII edición.