A praia das Catedrais xa pode ser visitada de novo este sábado. Así o veñen de anunciar o Concello e a Xunta. O areal estivo pechado o xoves e o venres por mor da borrasca Nelson. O alcalde, Dani Vega, dixo que “desde o Concello e a Xunta de Galicia, sempre nesa colaboración permanente, tomamos a decisión de abrir a praia das Catedrais, evidentemente baixo os parámetros da seguridade, velando pola seguridade das persoas, ás que tamén pedimos colaboración”.
Para Vega “é importante que cando se acude á praia das Catedrais se faga caso das indicacións dos vixiantes e do cumprimento da normativa. Si o facemos así todo é máis fácil”.
A praia das Catedrais cumpre hoxe os parámetros de seguridade e climatoloxía. “O que pedimos é prudencia e responsabilidade. Desde as doce do mediodía a praia quedou aberta e así poderemos xa contemplala e visitala”, conclúe.
