Por Daniel Rodríguez Saavedra.
O campo de fútbol de Pacios acolleu nun agarimoso e morno domingo a novena xornada da LNB NorLeste desta tempada que vai camiño de rematar. Un total de sesenta e tres palanadores (corenta e tres homes, dezaseis donas e catro cativos) disputaron esta xornada.
Remataron empatados a 23 puntos tres xogadores que se repartiron o podio nun desempate a tres carreiras. Juanki (Troitas Bravas) foi o máis acertado e subiu ao máis alto; segundo foi Basilio (Billardeiros Musicais) e terceiro Nolo (Billarda Río Miño).
En donas, repítese o podio do ano pasado pero en orden inverso, as ribadenses e musicais billardeiras Dori e Aroa dominaron, quedando terceira Cris (Castiñeiro Milenario) que se confirma como revelación da tempada e moi seria aspirante ao título.
En infantís o conto de sempre, Mateu e Diego non dan chance, desta volta a non asistencia das estrelas dos Troitas Bravas, Antía e Alba, permitiron subir ao podio a novísima Maré para completar o pleno do equipo Madia Leva.
Por equipos empataron a puntos Billardeiros Musicais e Troitas Bravas, sendo gañadores os primeiros por mellor puntuación individual. Terceiros foron os Billarda Río Miño.
Parabéns a tódolos palanadores e pola boa organización de Castiñeiro Milenario para este aberto, que rematou coa entrega de gustosos agasallos aos gañadores.
A vindeira xornada será o sábado 23 de marzo en San Miguel.
As clasificacións logo da novena xornada quedan así:
Individual:
- Basilio (Bill. Musicais) 195 p.
- Sachas (Troitas Bravas) 191 p.
- David Navallo (Troitas Bravas) 178 p.
Donas:
- Cris (Castiñeiro Milenario) 105 p.
- Aroa (Billardeiros Musicais) 99 p.
- Vanesa (Castiñeiro Milenario) 84 p.
Equipos:
- Troitas Bravas (A Pontenova) 736 p.
- Billardeiros Musicais (Ribadeo) 695 p.
- Madia Leva (Lugo) 638 p.
