Unha veciña de Muras vén de poñer en marcha xunto ao Concello de Muras, unha iniciativa que persegue recuperar imaxes antigas do municipio para crear un arquivo e poder levar adiante outros proxectos de recuperación cultural.
Para esta iniciativa, solicita a colaboración de toda a veciñanza, para que lles fagan chegar fotografías antigas de Muras para poder ofrecer ao resto da veciñanza unha imaxe de como eran os costumes, as celebracións, as xuntanzas, o trabalo, a escola, e toda a vida social que había.
“Máis aló do valor emocional que pode ter para cada un de nós ver, ou incluso coñecer a algún dos nosos, tamén nos axuda a entender moitas cosas dunha época, do noso pobo e da nosa xente. Son parte do noso patrimonio cultural”, explica Maider, que se encarga desta iniciativa.
O proceso para colaborar é sinxelo, consistiría en que os veciños acheguen as fotografías ao Concello dentro dun sobre co número de teléfono e o nome así como algunha información sobre as mesmas de saberse, como quen se ve nelas, lugar o ano aproximado. Al fotografías quedará en empresto ata finais de marzo para seren dixitalizadas. A principios de abril estas devolveranse ao seu dono en perfecto estado. Para aqueles que non poidan achegarse ata a casa consistorial, tamén ofrecen a posibilidade de pasar a recoller as fotos.
Maider dirixiuse a todos os veciños a través dunha carta onde explica o proceso que se vai realizar así como o obxectivo. “Prométoche que o resultado vai merecer a pena, polo valor que terá para todos nós como pobo e para os que virán, e porque vai ser unha magnífica forma de honrar o noso pasado, de dignificar aos que nos precederon e de sentirnos orgullosos das nosas raíces”, engade.