Na mañá de hoxe as tres entidades organizadoras da Festa do Queixo San Simón da Costa —o Concello de Vilalba, a Asociación de Queixeiros de San Simón da Costa e o Consello Regulador da DOP San Simón da Costa— presentaron a vixésimo oitava edición dunha cita que se celebrará en Vilalba os vindeiros días 6 e 7 de abril.
Dúas xornadas de homenaxe ao emblemático queixo San Simón da Costa que “nos unen e potencian a venda de queixos en Vilalba”, sinalou o presidente da Asociación de Queixeiros, Daniel Pérez, quen ademais anunciou que a feira se abrirá o sábado 6 ás 11:00 na Praza da Constitución para media hora máis tarde, ás 11:30, continuar coa actuación musical de Buxos Verdes que se estenderá durante toda a mañá.
Pola súa banda, a cita tamén ofrecerá ás 12:00 unha cata de queixos San Simón da Costa con maridaxe de viños galegos a cargo de Mercedes González e Salomé Beiroa. Pola tarde, a xornada dará comezo ás 16:30 cun taller infantil de elaboración de queixo e tamén para o público infantil haberá ás 17:30 un taller de cociña con queixo San Simón.
A media tarde o protagonismo concederáselle ao actor ourensán, Sergio Pazos, quen lerá o pregón ás 19:00 e logo participará ás 19:30 na entrega de premios da Ruta BTT Terra Chá do Queixo San Simón da Costa organizada polo Club Ciclista Terra Chá.
Para rematar, e como unha das novidades máis destacadas desta vixésimo oitava edición, a emerxente banda de Muros, The Rapants, pechará a xornada do sábado cun concerto na Praza de Santa María que dará comezo ás 21:00. Un evento que a alcaldesa de Vilalba, Marta Rouco, sinalou como “unha importante novidade que permitirá atraer outro tipo de público para abrir a cita a todas as idades”.
O domingo 7, no que ademais tamén se celebrará a feira mensual de Vilalba, a feira abrirá ás 10:00 e estará amenizada pola actuación musical de Cerna de Árbol dende as 11:30 ata as 15:00, momento no que se dará por concluída a XXVIII Festa do Queixo San Simón.
A rexedora vilalbesa, Marta Rouco, aproveitou a presentación da cita para “agradecer a todos os produtores e produtoras de queixo San Simón que sigan contribuíndo a poñer en valor un produto tan representativo do noso municipio coma este” e convidou a todos e todas a visitar a Feira do Queixo San Simón que converterá Vilalba “na capital gastronómica e de lecer da primeira fin de semana de abril”.
No acto de presentación ademais da alcaldesa e do presidente da Asociación de Queixeiros, Daniel Pérez, quen quixo convidar a todos e todas a “pasar a fin de semana en Vilalba” e gozar “do patrimonio cultural, gastronómico e paisaxístico” que posúe a capital chairega, tamén estiveron presentes a concelleira de Feiras e Mercados, Paula Vigo, e Patricia López, en representación de Caixa Rural como entidade patrocinadora da festa.
