Os deputados do Grupo Provincial Popular mantiveron unha xuntanza con representantes de Altri para coñecer de primeira man o proxecto da empresa e constatar que “é o mesmo que se presentou dende o primeiro intre”. Sinalaron que “chega con ir á hemeroteca para comprobar que as características son as mesmas e que sempre se trasladaron con total transparencia. O único que cambiou foi a postura da oposición”.
Dende o Grupo Provincial Popular trasladaron á empresa que “apoiamos, como fixemos sempre, todas aquelas iniciativas que optan por Lugo para asentarse, sempre e cando cumpran con toda a lexislación vixente, respecten o medio ambiente, xeren emprego e riqueza e axuden a fixar poboación no rural”.
A realidade é que “serán os técnicos os que analizarán o proxecto co máximo rigor e transparencia e se cumpre con todos os requisitos legais e ambientais, apoiaremos o proxecto como elemento xerador de riqueza”. Os populares recordan que hai dous anos presentáronse, tanto no Parlamento como na Deputación de Lugo, sendas iniciativas para defender a chegada de Altri á provincia de Lugo e que contou co apoio de todos os partidos políticos “por tratarse dunha gran aposta económica, laboral e estratéxica”. En ambas administracións as iniciativas se aprobaron por unanimidade co apoio de todos os grupos.
A oposición, en contra
Unha vez pasadas as eleccións e a campaña electoral, “na que tanto BNG como PSOE defenderon o proxecto, atopámonos que a esquerda volve aos seus cambios de opinión, e tenta boicotear o futuro da provincia de Lugo”. Defenden que “oportunidades así pasan unha vez cada 50 anos, con sorte”.
E trasladan o cambio de postura dos nacionalistas: “O BNG sempre acaba sendo vítima das súas contradicións, como ocorreu coas súas críticas á autopista AP-9 ou con Alcoa”. Ademais, recordan que o voceiro socialista no Parlamento de Galicia, José Ramón Gómez Besteiro, “agora amosa dúbidas sobre o proxecto, pero cando foi delegado do Goberno en Galicia chegou a ofrecerse como mediador entre Altri e o Ministerio de Industria” para que a empresa se instalase en Lugo.
Dende o Grupo Provincial Popular sinalan que tanto PSOE como BNG terán que explicar por que en dous anos pasaron de apoiar a Altri no Parlamento de Galicia e na Deputación de Lugo a, unha vez pasaron as eleccións, tentar boicotear a súa instalación.
