Durante dúas semanas, un grupo de dez estudantes e dous profesores do sector turístico e agrícola mergullouse nunha experiencia educativa única no concello de Friol, Lugo. Organizado polo Departamento de Relacións Internacionais e Proxectos Erasmus+ do Colexio Plurilingue Liceo A Paz da Coruña, este programa innovador combinou leccións prácticas, visitas culturais e talleres especializados, destacando, ademais, a importancia do inglés con fins específicos nos sectores hostaleiro, turístico e agrícola.
Unha parte central da experiencia foi a serie de visitas a empresas do Concello de Friol. Entre estas visitas destácanse Tralo Agro, unha granxa orgánica onde os participantes aprenderon sobre as prácticas sostibles na produción cárnica; Casa Zolle, unha queixería local onde se puido apreciar o proceso de elaboración de queixos artesanais; e Casa Suso, unha panadería tradicional onde se exploraron as técnicas de produción do pan típico da rexión. Estas visitas proporcionaron aos participantes unha comprensión máis profunda do emprendemento rural, a produción agrícola, as cadeas de valor e a dinámica do mercado na rexión.
Paralelamente, os participantes reuníronse con María Ángeles Buján Burgo, Concelleira de Cultura e Turismo do Concello de Friol, quen os recibiu na casa do concello. Este encontro formal brindou aos participantes a oportunidade de coñecer de primeira man as medidas que se impulsan desde o Concello para promover o emprendemento na rexión.
Ademais das visitas a empresas locais, os participantes tamén tiveron a oportunidade de reunirse con varias representantes do GDR Grupo de Desenvolvemento Rural da Comarca de Lugo, quen compartiu información sobre as iniciativas levadas a cabo na rexión e brindaron visibilidade aos proxectos Erasmus+ que se promoven desde esta organización.
Este programa educativo foi posible grazas á colaboración Erasmus+ entre o Colexio Plurilingue Liceo A Paz, o Concello de Friol e empresas do Municipio co obxectivo de ofrecer un completo programa formativo aos participantes procedentes do Instituto d’Instruccione Superiore Merendino (Italia).
Estas visitas permitiron aos participantes e profesorado acompañante non só aprender sobre as prácticas empresariais na contorna rural, senón tamén conectar coas persoas que están a impulsar o desenvolvemento económico da rexión de Friol.
Cun enfoque na aprendizaxe experiencial e a aplicación práctica de coñecementos, este programa sentou as bases para un futuro máis sólido e sostible nos campos do turismo rural e a agricultura.
A presente mobilidade Erasmus+ non só foi unha experiencia formativa, senón unha viaxe de descubrimento e conexión coa riqueza cultural e empresarial da rexión. Coa guía de profesores dedicados, o apoio das institucións locais e a hospitalidade dos habitantes de Friol, os participantes non só adquiriron coñecementos prácticos, senón que tamén sementaron a semente de futuras colaboracións e proxectos. Esta inmersión deixou unha pegada profunda en todos os involucrados, inspirando un compromiso renovado co emprendemento rural e a preservación das tradicións locais.
