Os máis de catrocentos estudantes de secundaria que este ano forman parte do proxecto educativo Activistas polo O Mundo Que Queremos reciben estes días a visita de dúas activistas colombianas que loitan por mellorar as condicións de vida das poboacións afectadas polo conflito armado que entre 1985 e 2018 provocou a morte de máis de 450.000 persoas no seu país.
Despois de percorrer diferentes puntos da xerografía galega, as activistas achegaranse este venres ao IES Lois Peña Novo de Vilalba. O obxectivo deste encontro entre as activistas e o alumnado de 1º e 2º do FP de Atención a Persoas en Situación de Dependencia, é que os alumnos e alumnas coñezan a loita e o traballo destas mulleres de primeira man, se inspiren na súa forma de intervir na súa realidade a través do activismo, e tamén reflexionen sobre as desigualdades norte-sur.
As activistas que se achegarán a Vilalba son Yorya Gaviria e Sara Graciano, da Fundación Forjando Futuros, que traballa en Colombia dende fai máis de vinte anos na restitución das terras desposuídas ou abandonadas con motivo do conflito armado e na defensa e promoción dos dereitos humanos e o fortalecemento de comunidades vulnerables.
Sara Graciano é psicóloga, e ten experiencia traballando en Laboratorios Xuvenís e, en xeral, con xuventude colombiana de entornos vulnerables en cuestións como a participación democrática, os dereitos humanos e a paz, a memoria histórica, a saúde mental e a apropiación do territorio.
Yorya Gaviria pola súa parte, ten experiencia e formación en ciberactivismo, teatro, performance e antirracismo. O seu traballo e activismo céntranse na sensibilización ao redor das violencias de xénero e a defensa dos dereitos humanos para a poboación LGBTIQA+.
Esta actividade será a sesión final dunha metodoloxía pedagóxica que o alumnado desenvolve dende comezos de curso. Un itinerario co que puideron coñecer o que significa ser unha persoa activista, reflexionaron sobre o papel dos medios de comunicación e as redes sociais e utilizaron a radio para o seu activismo creando os seus propios podcast radiofónicos.
O proxecto Activistas polo mundo que queremos, que xa chegou nos seus 11 anos de historia a máis de 4800 mozos e mozas galegos, é posible grazas a unión de tres ONGDs, Solidariedade Internacional de Galicia, Asociación Galega de Comunicación para o Cambio Social (Agareso) e Asemblea de Cooperación pola Paz (ACPP) e ao financiamento da Dirección Xeral de Relacións Exteriores e coa UE. Forma parte da plataforma de innovación educativa ‘Plan Proxecta’, impulsada pola Consellería de Cultura, Educación e Ordenación Universitaria.
As ONGDs galegas traballan man a man con organizacións colombianas como Forjando Futuros para xerar as condicións necesarias para que a cidadanía se empodere e se organice na procura do seu propio desenvolvemento para equilibrar os niveis de desigualdade estrutural que se dan neste momento.
Parte importante deste traballo é a propia difusión, así que dende Activistas polo Mundo que Queremos convidamos aos medios de comunicación a que compartan esta información. Se queredes acudir ás sesións presenciais onde se realizarán as charlas por favor, comunicádevos previamente con nós, para que avisemos aos centros educativos.
