Pontón reclama a Rueda un “escudo social galego” fronte ao impacto da guerra en Oriente Medio
A portavoz nacional do BNG, Ana Pontón, reclamou desde Pontevedra ao Goberno de Alfonso Rueda a activación dun “escudo social galego” para facer fronte ás consecuencias económicas da escalada do conflito en Oriente Medio.
Pontón advertiu de que a Xunta non pode permanecer allea a unha situación que xa está a impactar na economía galega, especialmente polo incremento dos custos enerxéticos, de combustibles e materias primas.
Medidas para protexer á cidadanía e aos sectores produtivos
A líder nacionalista propuxo un conxunto de medidas dirixidas a apoiar ás familias e ao tecido produtivo galego. Entre elas, destacou:
Axudas directas aos sectores máis afectados, como o transporte, o agrogandeiro e o pesqueiro
Levantamento das peaxes nas autoestradas dependentes da Xunta
Creación dun bono transporte cun custo máximo de 30 euros ao mes
Duplicación do complemento autonómico das pensións non contributivas
Liñas de crédito para pequenas e medianas empresas
Fondo extraordinario de apoio aos concellos
Pontón subliñou que estas medidas buscan paliar o impacto do aumento do custo da vida, que xa estaba “polas nubes” e que agora pode agravarse.
Críticas á Xunta por “pasividade”
A portavoz do BNG criticou a falta de reacción do Goberno galego ante esta situación, asegurando que “non pode mirar para outro lado” mentres a crise afecta a empresas e familias.
Neste sentido, reclamou máis anticipación e responsabilidade por parte do Executivo autonómico para defender os intereses de Galicia nun contexto de incerteza económica.
“Non estamos falando de números, estamos falando de empregos, de empresas e do día a día de moitas familias”, advertiu.
Proposta sobre o Pazo de Meirás
Pontón tamén se referiu á recente sentenza do Tribunal Supremo sobre o Pazo de Meirás e avanzou que o BNG levará ao Parlamento unha proposta de declaración institucional.
O obxectivo é que a Cámara galega manifeste que non debe existir indemnización á familia Franco pola devolución do inmoble, ao considerar que a súa ocupación foi ilexítima.
A líder nacionalista defendeu que o pazo é patrimonio público e que, no seu lugar, deberían ser os herdeiros do ditador quen compensasen á cidadanía polo uso indebido durante décadas.