728 viticultores reciben axudas da Xunta para conservar a paisaxe e frear a erosión na Ribeira Sacra
A Consellería do Medio Rural da Xunta de Galicia fixo pública no Diario Oficial de Galicia a resolución dunha nova convocatoria de axudas destinadas á conservación da paisaxe e á loita contra a erosión nos viñedos da Ribeira Sacra.
Nesta edición, un total de 728 viticultores resultaron beneficiarios, todos eles inscritos no rexistro do Consello Regulador da Denominación de Orixe Ribeira Sacra. O orzamento global da convocatoria supera os 1,5 millóns de euros e procede integramente de fondos propios da Xunta.
As achegas establécense en función do tipo de cultivo. Para o sistema considerado tipo 1, correspondente a viñedos en socalcos de pedra traballados de forma manual, a axuda pode chegar aos 2.000 euros por hectárea. No caso do tipo 2, onde se empregan métodos mecanizados, a contía máxima sitúase en 1.000 euros por hectárea. En todos os casos, a subvención por persoa beneficiaria non poderá exceder os 50.000 euros.
O cálculo das axudas realizouse tomando como referencia a superficie de viñedo inscrita, e esta é a segunda vez que se pon en marcha esta liña de apoio.
O obxectivo destas achegas é recoñecer o labor dos viticultores da denominación de orixe, que contribúen ao mantemento desta paisaxe de alto valor ambiental e cultural, evitando o abandono dos socalcos.
Ademais, esta zona destaca polo seu atractivo turístico en crecemento e pola súa candidatura a ser recoñecida como Patrimonio da Humanidade pola UNESCO.