Besteiro insta aos votantes do 29 de novembro a escoller entre «dereita ou dereitos»
O secretario xeral do PSdeG, José Ramón Gómez Besteiro, aplaudiu este luns a decisión do presidente do Goberno, Pedro Sánchez, de convocar eleccións xerais para o 29 de novembro e sinalou a disxuntiva que, ao seu xuízo, terá que afrontar a cidadanía: «Nestas eleccións non só se vai decidir quen gobernará España nos próximos anos. Imos ter que elixir entre dereita ou dereitos».
Besteiro asegurou que os socialistas galegos están «preparados para saír a gañar estas eleccións» e reivindicou o PSdeG como «o único partido que ten a forza, a capacidade e, o que é máis importante, a determinación necesarias para darlle un verdadeiro portazo político á extrema dereita e a esa dereita extrema». Por este motivo, apelou á responsabilidade da cidadanía.
A vivenda será, segundo o líder socialista, un dos principais eixes do debate electoral. «Xa dixen o outro día que estas eleccións ían ser un referendo en favor do dereito á vivenda: en que condicións se accede a unha vivenda, quen pode acceder a unha vivenda digna e quen, desgraciadamente, non», lembrou.
Besteiro asegurou ademais que Galicia terá un papel destacado nesta cuestión, ao tratarse dunha competencia da comunidade autónoma, e instou o presidente do PP, Alberto Núñez Feijóo, a explicar durante a campaña «que fixo durante trece anos en Galicia en favor da vivenda pública». «Ata agora non sabemos cal é a súa posición nin como vai construír. Pero si sabemos algo: durante moitos anos estivo aquí e non fixo absolutamente nada», afirmou.
O secretario xeral do PSdeG contrapuxo as mobilizacións celebradas o pasado sábado en distintas cidades galegas en defensa do acceso á vivenda coa posición do PP no Congreso, onde o pasado venres votou en contra dos decretos de vivenda xunto con Vox, Junts e UPN. «Este fin de semana miles de persoas manifestáronse, e non só nos espazos públicos: nas casas e nas familias de toda Galicia víase o apoio a quen reclama o acceso á vivenda. Pola contra, o Partido Popular estaba de festa», criticou.
Na súa opinión, a votación parlamentaria serviu para evidenciar as posicións de cada formación. Besteiro acusou a quen no seu día apoiou o rescate da banca de apostar agora por non «rescatar» as persoas. «Rescatan bancos, rescatan entidades financeiras, pero non queren rescatar as persoas», resumiu. Ao mesmo tempo, celebrou que o Goberno vaia aprobar novamente os decretos para que poidan ser debatidos outra vez na Deputación Permanente do Congreso.
«A cidadanía vai decidir a quen lle entrega as chaves do Goberno», advertiu Besteiro, que contrapuxo a posibilidade de que o Executivo estea en mans de Feijóo, Rueda e Abascal coa alternativa dun goberno que considere a vivenda como un dereito e a incorpore como «quinto piar do Estado do benestar».
O dirixente socialista lembrou que a sanidade, as pensións, a educación pública e a dependencia, que definiu como «unha construción do presidente Rodríguez Zapatero», xa forman parte dos piares do Estado do benestar. «A responsabilidade de levar adiante nos últimos 40 anos as propostas máis ambiciosas para este país ten un nome e ten un partido, que é o Partido Socialista», subliñou.
Besteiro tamén puxo en valor os datos económicos e sociais do Goberno central. Segundo indicou, España supera os 22,4 millóns de afiliados á Seguridade Social, mantén un crecemento superior ao da zona euro e ao de Alemaña ou Francia, mentres que o salario mínimo interprofesional alcanza os 1.221 euros, un 66 % máis que en 2018. «Se nolo din hai dez anos, ningún dos que estamos aquí o crería», sinalou. A estas cifras engadiu a revalorización anual das pensións e o papel internacional de España, incluído o recoñecemento de Palestina.
O líder do PSdeG contrapuxo estas políticas ás aplicadas polos gobernos do PP de Mariano Rajoy e ao Executivo de Feijóo en Galicia, aos que reprochou que durante as crises adoptasen, segundo a súa valoración, a postura de «que cada un se amañe como poida». Fronte a iso, destacou a resposta do Goberno de Sánchez ante a pandemia, a erupción dun volcán, a guerra en Europa e o conflito en Oriente Medio. «Poderanse cuestionar moitas das medidas, pero ninguén poderá dicir que o Goberno mirou para outro lado», afirmou.
Besteiro asegurou que a mobilización electoral xa está en marcha e defendeu que «a esquerda non se vai abster, a esquerda vai ir votar». Tamén incluíu no seu chamamento ao centro-esquerda, formado por persoas que, segundo indicou, consideran que un Goberno progresista pode defender os seus dereitos e mellorar a súa situación. Ao seu xuízo, a polémica pola votación dos decretos de vivenda actuou como «un catalizador» dunha sensación que xa se viña manifestando.
Na súa comparecencia, o secretario xeral do PSdeG tamén expresou o apoio da formación ao alcalde de Vilagarcía de Arousa e presidente da Federación Galega de Municipios e Provincias (Fegamp), Alberto Varela, que presentará unha denuncia pola agresión sufrida o sábado ao berro de «rojos de mierda». «Non podemos, nin debemos, nin imos normalizar nunca os insultos, as manifestacións de odio e de violencia», afirmou.
Besteiro atribuíu este tipo de episodios ao clima de crispación política e advertiu de que a tensión pode provocar que «irresponsables e violentos» crucen unha liña que, na súa opinión, nunca debería superarse. Asegurou que o PSOE actuará contra as persoas que empreguen a violencia e o insulto como forma de expresión política e considerou que o sucedido en Vilagarcía «marca un antes e un despois».
En relación co proceso interno do partido, Besteiro informou de que a Executiva galega se reunirá esta tarde e apuntou que o calendario para elaborar as candidaturas podería quedar pechado nos próximos dez ou quince días. O proceso, explicou, desenvolverase «coas garantías de sempre no PSOE», coa participación das agrupacións ata chegar á decisión final do Comité Federal sobre as listas electorais en toda España.