O PSdeG pide explicacións á Xunta pola posta en marcha dunha FP Básica en Carral tras a dimisión da directiva
O Grupo Parlamentario Socialista trasladará ao Parlamento de Galicia a situación creada no IES de Carral logo da dimisión en bloque do equipo directivo, vinculada á decisión de implantar unha nova aula de Formación Profesional Básica para o vindeiro curso 2026-2027.
Segundo informou a dirección do centro ao Consello Escolar e á inspección educativa, a medida teríase adoptado sen unha negociación previa coa comunidade educativa nin unha planificación clara dos espazos necesarios, e sen acordo entre as administracións implicadas.
Aínda que o instituto non cuestiona a ampliación da oferta formativa, si subliña a necesidade de que calquera cambio deste tipo se faga con coordinación, planificación e dotación suficiente de recursos materiais e humanos.
A deputada socialista no Parlamento galego, Silvia Longueira, sinalou que a implantación dunha nova liña de FP debe contar co consenso do centro, do Concello e da Xunta, e criticou que a decisión chegase “sen explicacións claras sobre como se vai desenvolver”.
Longueira advertiu ademais de que o instituto xa presenta problemas de capacidade, polo que a chegada de novo alumnado podería agravar a situación se non se amplían os medios dispoñibles.
Tamén puxo o foco na falta de previsión en materia de persoal, asegurando que “non hai nestes momentos recursos humanos que avalen esta nova implantación”.
Os socialistas reclaman agora explicacións á Consellería de Educación sobre os motivos da medida e sobre a planificación prevista, nun contexto próximo ao final do curso escolar.