Agro

Esta partida está destinada a explotacións agrarias da provincia dentro dun plan de 700 millóns de euros para compensar a suba do prezo deste insumo

Un total de 391 agricultores e agricultoras da provincia de Ourense beneficiaranse dunha partida de 508.183,86 euros en axudas directas destinadas a compensar o encarecemento dos fertilizantes. Este financiamento forma parte do paquete de medidas extraordinarias posto en marcha polo Goberno de España para reducir o impacto que a suba do prezo deste insumo está a ter sobre as explotacións agrarias.

Segundo os datos feitos públicos, as persoas beneficiarias na provincia ourensá suman unha superficie conxunta de 10.715,80 hectáreas. Dese total, 8.916,89 hectáreas pertencen a cultivos de secaño, para os que se recoñeceron axudas por 341.784,43 euros, mentres que as 1.798,91 hectáreas restantes corresponden a regadío, cunha asignación de 166.399,43 euros.

A nivel autonómico, esta primeira relación de beneficiarios chega a 3.299 persoas en toda Galicia. No conxunto do Estado, a medida chegará a 249.376 agricultores e agricultoras, que se repartirán un total de 494,57 millóns de euros.

O senador do PSdeG-PSOE por Ourense, Rafa Villarino, valorou esta iniciativa como unha mostra do "compromiso do Goberno de España co sector primario, especialmente nun momento no que os custos de produción están a someter a unha forte presión ás explotacións agrarias". O dirixente socialista explicou que a axuda supón que "máis de medio millón de euros van chegar directamente a 391 explotacións da provincia de Ourense", o que contribuirá a asumir o gasto derivado dun insumo que considera "fundamental para garantir a produción agrícola". Villarino engadiu que se trata de "medidas concretas que teñen un impacto real no día a día dos nosos agricultores e agricultoras".

Así mesmo, o senador subliñou que a finalidade última desta liña de axudas é "evitar que o incremento do prezo dos fertilizantes recaia sobre as explotacións e, despois, sobre o prezo dos alimentos", ao tempo que se busca que as explotacións poidan manter niveis adecuados de fertilización e, con iso, os seus volumes de produción.

Unha medida dotada con 700 millóns de euros

Estas axudas extraordinarias enmárcanse no artigo 50 do Real Decreto-lei 7/2026, do 20 de marzo, do Plan Integral de Resposta á Crise de Oriente Medio, aprobado polo Goberno de España. Esta norma prevé unha subvención global de 700 millóns de euros para facilitar a adquisición de fertilizantes ante a forte suba do seu prezo. As persoas beneficiarias poderán percibir ata 92,50 euros por hectárea no caso dos cultivos de regadío, e ata 38,33 euros por hectárea nos de secaño.

Villarino sinalou que o sector agrario da provincia "sabe que non está só", poñendo estas axudas como exemplo dunha resposta "rápida" ante unha situación "extraordinaria" provocada polo encarecemento dunha materia prima que considera esencial para a actividade agrícola. Neste sentido, defendeu que "é fundamental que as administracións estean ao lado dos produtores cando se producen situacións que comprometen a súa rendibilidade", subliñando que a agricultura e a gandaría son "sectores estratéxicos para Ourense" que precisan "medidas de apoio, non discursos baleiros".

Por último, indicouse que o Ministerio de Agricultura, Pesca e Alimentación ten previsto publicar proximamente unha segunda relación de potenciais beneficiarios, polo que o número final de agricultores e agricultoras da provincia que poidan acceder a estas axudas podería incrementarse. O primeiro listado de beneficiarios, xunto coas contías correspondentes, xa se pode consultar a través da páxina web do Fondo Español de Garantía Agraria (FEGA).

Villarino concluíu destacando que "o Goberno de España mobiliza 700 millóns de euros para apoiar directamente aos agricultores fronte a unha suba extraordinaria dos fertilizantes", e expresou a súa expectativa de que a segunda relación permita que "máis explotacións da provincia poidan beneficiarse desta medida".