A Cidade da Cultura acolle o Taller Infectolóxico con Galicia á vangarda en vacinación
A Cidade da Cultura de Santiago acolleu a 12ª edición do Taller Interactivo Infectolóxico: tendencias actuais e novos enfoques en enfermidades infecciosas e vacinas, un encontro que reúne expertos nacionais e internacionais para abordar os últimos avances neste ámbito. O conselleiro de Sanidade, Antonio Gómez Caamaño, inaugurou o evento destacando o avance da campaña de vacinación da Xunta.
Segundo precisou, máis de 600.000 galegos xa están inmunizados fronte á gripe e 360.000 fronte á covid-19, uns datos que consolidan a Galicia como unha das comunidades con mellor cobertura vacinal do Estado. Gómez Caamaño subliñou que o sistema sanitario público galego conta cun dos programas de inmunización máis completos do mundo, reforzado pola incorporación continua de novas vacinas.
Entre estas novidades, o conselleiro lembrou a introdución da vacina fronte ao virus respiratorio sincitial (VRS) en bebés; a vacinación do virus do papiloma humano (VPH) en varóns até os 21 anos; e a inmunización fronte á gonorrea mediante unha vacina destinada inicialmente á protección contra a meninxite B.
Tamén puxo en valor o programa piloto de vacinación intranasal fronte á gripe realizado en 55 centros educativos galegos, así como o estudo sobre a vacina de alta carga Galflu, desenvolvida polo Grupo de Xenética, Vacinas e Enfermidades Infecciosas do Instituto de Investigación Sanitaria de Santiago en colaboración coa Consellería.
Inicio precoz da onda gripal
Gómez Caamaño advertiu que Galicia está a rexistrar un inicio precoz da onda epidémica da gripe, cunha intensidade aínda baixa pero cunha tendencia crecente. En canto á cobertura vacinal, destacou que o 44 % das crianzas de 0 a 11 anos, o 58,7 % das persoas maiores de 65 anos e máis do 52 % do persoal sanitario xa están inmunizados fronte á gripe.
Respecto á covid-19, máis do 54 % das persoas maiores de 70 anos xa recibiron a vacina, así como case o 33 % do persoal sanitario.
O conselleiro concluíu salientando o alto nivel científico desta edición do taller, que reúne especialistas de referencia internacional no estudo das enfermidades infecciosas e no desenvolvemento de vacinas.