Actualidade

A CIG lanza a súa campaña do 25N denunciando a permisividade das institucións coa violencia machista e acusando ao Goberno galego de recortar en igualdade. A central reclama recuperar estruturas públicas, reforzar os servizos e poñer fin á violencia institucional.

A secretaria das Mulleres da CIG presentou este 25 de Novembro, Día Internacional para a Eliminación da Violencia contra as Mulleres, unha campaña centrada na denuncia da violencia institucional e na crítica aos recortes en igualdade aplicados polo Goberno galego. Baixo o lema “Retroceder en dereitos, incrementa a violencia. Por unha Galiza con dereitos, traballo digno e igualdade”, a central alerta de que a permisividade das institucións fronte ás condutas machistas deixa ás mulleres máis desprotexidas.

No marco desta campaña, en Santiago de Compostela terá lugar o Encontro Nacional de Mulleres da CIG, ás 10:30 horas no salón de actos da Facultade de Ciencias Políticas. Ao remate, as asistentes marcharán en manifestación ata a sede do PP, na rúa San Pedro de Mezonzo, onde realizarán unha concentración.

Acusación directa á Xunta por violencia institucional

A secretaria confederal das Mulleres, Margarida Corral, explicou que, tras anos de denuncia dos comportamentos machistas e da falta de perspectiva de xénero nas políticas públicas, nesta ocasión “acusamos co dedo ao Goberno da Xunta como responsábel e cómplice da violencia institucional”.

Entre os exemplos que sinala, destaca o apoio público ofrecido polo presidente da Xunta, Alfonso Rueda, e polo director xeral de Loita contra a Violencia de Xénero, Roberto Barba, ao ex conselleiro do Mar, Alfonso Villares, imputado por agresión sexual, “poñendo en dúbida a muller que o denunciou”. Tamén considera violencia institucional o modelo de servizos sociais impulsado pola Consellería de Política Social, que perpetúa a precariedade e a infravaloración dos traballos de coidados.

Corral advertiu de que o desmantelamento das políticas de igualdade e a tolerancia fronte aos comportamentos machistas desde o poder “transmiten mensaxes perigosas que normalizan a violencia”.

Parálise e recortes en igualdade

A CIG denunciou a supresión da Secretaría Xeral de Igualdade —reducida a unha dirección xeral dirixida por un home— como “a maior parálise institucional das políticas de igualdade desde a eliminación do Servizo Galego de Igualdade”. Isto motivou que 42 colectivos feministas solicitasen en 2024 a intervención da Valedora do Pobo.

A este cambio estrutural súmase un descenso do 6,4% no orzamento destinado á loita contra a violencia de xénero, nun contexto no que as denuncias aumentaron un 10% respecto de 2024. “De media, os xulgados reciben 21 denuncias ao día, case unha por hora”, alertou Corral, sinalando ademais que “a metade do orzamento non chega ás mulleres”.

Criticou tamén que os centros de atención 24 horas estean privatizados, a mercantilización dos coidados, a precariedade laboral e o insuficiente desenvolvemento da Lei de Dependencia.

Reclamacións e mobilizacións

Fronte a esta situación, a CIG esixe recuperar a Secretaría Xeral de Igualdade e o Servizo Galego de Igualdade, reforzar os recursos públicos, garantir persoal competente e asegurar unha cobertura real en todo o territorio galego.

Corral insistiu en que a central non só denuncia, senón que formula propostas para garantir a eliminación da violencia e acadar a igualdade real. “Non imos ficar caladas cando quen debe protexer ás vítimas se pon do lado do depredador”, dixo, dando voz ás mulleres acosadas, agredidas e precarizadas “polo goberno da dereita”.

Adiantou que, ante a negativa do PP a recibir á central, a CIG levará a protesta directamente á sede do partido. “Desta volta mudamos o conto: a carapuchiña vermella, coa axuda da súa avoa dependente, castigará ao lobo e ao seu cómplice o cazador”, afirmou.

Críticas tamén ao Goberno do Estado

A secretaria das Mulleres criticou tamén a actuación do Goberno estatal, ao considerar que queda na propaganda e non desenvolve medidas reais contra o acoso laboral. Reclamou o desenvolvemento inmediato do Convenio 190 da OIT, así como a creación de protocolos efectivos e estudos que melloren os sistemas de denuncia e protección das vítimas.

Corral concluíu cun chamado á cidadanía a participar nas mobilizacións convocadas pola Marcha Mundial das Mulleres e outros colectivos feministas na tarde do 25 de novembro.